Дасье ў карыкатурах: Інфляцыя супраць Султана

Турцыя знаходзіцца на чарговым этапе валютнага крызісу. Нацыянальная валюта таннее рэкорднымі тэмпамі, падрываючы пазіцыі рэжыму Рэджэпа Таіпа Эрдагана, які любіць называць сябе «Султан».

zastavka_55.png


Турцыя, для якой валютны хаос стаў ужо звыклым атрыбутам апошніх гадоў, выйшла на новы віток валютнага крызісу. Курс нацыянальнай валюты — ліры — зніжаецца настолькі імкліва, што цяжка асэнсаваць. Для разумення: да 2014 года ён стабільна трымаўся каля 1,7-1,8 ліры за долар. Да пачатку гэтага года курс дасягнуў узроўню 7,3 ліры за долар. А цяпер назіраецца сапраўды калапс. За мінулы тыдзень ліра 5 разоў абнавіла рэкорды гістарычнага мінімуму.
Трагедыю ліры арыгінальна адлюстраваў мастак выдання Hedgeye, прадставіўшы свой варыянт дызайну купюры турэцкай валюты.

261212802_6427816117289645_331965088853904898_n.png


Многія лічаць, што ў крызісе вінаваты сам Эрдаган. Ён зрабіў крэдыты таннымі, каб падштурхнуць эканамічны рост краіны. Слабая ліра дапамагае экспартным таварам на замежных рынках. ВУП Турцыі сапраўды паказвае рост, аднак коштам галапуючай інфляцыі і рэзкай дэвальвацыі мясцовай валюты. Хаця сам лідар Турцыі сябе вінаватым не лічыць. Ён заявіў, што ў рэзкім падзенні курсу нацвалюты вінаватыя «замежныя агенты». Падыход Эрдагана да праблемы інфляцыі нагадала мастаку выдання PA Turkey вядомую позу страуса. У нашым выпадку страус не жадае ні чуць, ні бачыць, ні казаць пра інфляцыю.

2_464.png


У адказ на крах ліры па краіне пракаціліся акцыі пратэсту. На дэманстрацыі выйшлі жыхары некалькіх буйных гарадоў, у тым ліку Анкары і Стамбула. Мітынгоўцы выкрыквалі антыўрадавыя лозунгі і стукалі ў пустыя каструлі. У Анкары стыхійная акцыя перарасла ў сутыкненні з паліцыяй. Мітынгоўцы таксама запатрабавалі адстаўкі ўлады і правядзення датэрміновых парламенцкіх і прэзідэнцкіх выбараў. Шмат каму выступы нагадалі пратэсты 2013-га на плошчы Таксім у Стамбуле, якія ўлады жорстка задушылі. Успомнілі і карыкатуры тых гадоў. Напрыклад, малюнак выдання Turk Haber.

3_414.gif


Зрэшты, пакуль пратэсты носяць лакальны характар. Магчыма, іх невялікі маштаб тлумачыцца адсутнасцю лідара. Прыкладна 18 лістапада пайшлі чуткі аб смерці ў ЗША Фетхула Гюлена. Гэты 80-гадовы вучоны і прапаведнік лічыцца ў Турцыі ворагам Эрдагана нумар адзін. Яму прыпісваюць спробу перавароту 2016 года. Пасля таго, як рэжым Рэджэпа Эрдагана расправіўся са змоўшчыкамі, у Турцыі пачалося сапраўднае паляванне на прыхільнікаў Гюлена. Зацыкленасць Эрдагана на тым, каб дастаць саперніка нават за акіянам, — тэма малюнка мастака Ліндзі Хембі.

4_390.jpg

Многія звярнулі ўвагу, што падзенне ліры аказалася сінхронным актывізацыі Турцыі за мяжой. Краіна ўдзельнічае ў канфліктах у Сірыі і Лівіі, дапамагае Азербайджану ў Карабаху, пікіруецца з Грэцыяй і спрабуе наладзіць інтэграцыю цюркскамоўных краін. Войны і канфлікты патрабуюць сродкаў, што ў тым ліку адбіваецца на курсе ліры. Графічна гэтую ўзаемасувязь прадставіла выданне Instaforex.

5_360.jpg


Нягледзячы на тое, што пратэставая геаграфія пакуль невялікая, сітуацыя ў Турцыі застаецца нестабільнай. Інфляцыя запусціла працэс банкруцтва дробных гандляроў і дэфіцыту прадуктаў. І па ходзе набліжэння выбараў у 2023-ым, відавочна, градус нянавісці ў адрас Эрдагана будзе толькі расці. Ужо зараз няма сумневу, што Эрдаган у адказ будзе выкарыстоўваць клерыкальныя лозунгі. Невыпадкова на малюнку аднаго з турэцкіх граіфкаў прэзідэнт разганяе апазіцыянераў, трымаючы ў руцэ Каран. Раней рэлігія дапамагла Султану выйграваць выбары. Паглядзім, што будзе на гэты раз.

6_249.jpg