Германія атрымала ад турэцкіх дыпламатаў 136 просьбаў пра прытулак

Улады Германіі паведамілі, што за апошнія паўгода атрымалі ад турэцкіх дыпламатаў 136 запытаў аб прадастаўленні палітычнага прытулку.

Колькасць заявак пачала рэзка расці пасля таго, як у ліпені 2016 года ў Турцыі правалілася спроба звяржэння прэзідэнта Эрдагана.

У заяве міністэрства ўнутраных спраў Германіі не названыя прозвішчы гэтых 136-ці, але адзначаецца, што ўсе яны — трымальнікі дыпламатычных пашпартоў. Сярод гэтых людзей могуць быць не толькі дыпламатычныя работнікі, але і іх сямейнікі, якім таксама выдаюцца дыпламатычныя пашпарты.

Пасля спробы перавароту ў Турцыі пачаліся маштабныя кадравыя чысткі і арышты. З краіны збегла група вайскоўцаў, якія, як мяркуецца, прымалі ўдзел у путчы.

У канцы студзеня ўлады Грэцыі адмовіліся выдаць Турцыі васьмярых ваенных, што ўцяклі з краіны, чым выклікалі гнеў турэцкіх уладаў.

Нагадаем, узброенае паўстанне ў Турцыі пачалося ўвечары 15 ліпеня 2016 года. Група афіцэраў заявіла, што бярэ кіраванне краінай у свае рукі.

Ваенныя змаглі на некалькі гадзін узяць пад кантроль галоўныя вуліцы, масты і некалькі стратэгічна важных будынкаў у Анкары і Стамбуле, але неўзабаве паўстанне было здушана, а яго ўдзельнікі арыштаваныя. У выніку паўстання загінулі некалькі сотняў чалавек.

Улады Турцыі абвінавацілі ў арганізацыі перавароту прапаведніка Фетхулу Гюлена, які жыве ў ЗША, і запатрабавалі яго экстрадыцыі.

У ходзе расследавання ў Турцыі былі затрыманыя тысячы чалавек. Арыштаваныя скардзіліся на невыкананне іх правоў і катаванні.

Паводле ВВС