Грузія: Апазіцыя назвала выбары сфальсіфікаванымі ў выніку спецаперацыі паводле расійскага сцэнару

Чатыры апазіцыйныя партыі, якія пераадолелі прахадны бар'ер на грузінскіх парламенцкіх выбарах, заявілі, што не будуць працаваць у новым парламенце і заклікалі сваіх прыхільнікаў на мітынг пратэсту. Пры гэтым застаецца адкрытым пытанне першага пленарнага пасяджэння парламента, якое згодна з Канстытуцыяй павінен прызначыць прэзідэнт, а Саламэ Зурабішвілі таксама не прызнае выбары легітымнымі, піша  «Эхо Кавказа».

Паводле звестак ЦВК Грузіі, «Грузінская мара» атрымае ў новым заканадаўчым органе 89 мандатаў са 150-ці. У парламент 11-га склікання таксама праходзяць чатыры апазіцыйныя палітычныя блокі і партыі, якія агулам атрымалі 61 дэпутацкае месца.

У апазіцыі вынікі выбараў не прызнаюць і заяўляюць аб адмове ад удзелу ў працы парламента. 

Першымі пра гэта заявілі ў кааліцыях «За перамены» і «Адзінства – нацыянальны рух», следам за імі — аб'яднанне «Моцная Грузія». Учора, 28 кастрычніка, да байкоту далучыліся прадстаўнікі «Гахарыя за Грузію», лідар якой патлумачыў затрымку высвятленнем маштабаў фальсіфікацый на выбарах.

 Доказы сабраныя і будуць перададзеныя ў пракуратуру, заявіў на брыфінгу Георгій Гахарыя: «Мы бачылі заявы міжнародных маніторынгавых арганізацый, а таксама нашых стратэгічных партнёраў аб тым, што калі сістэмныя парушэнні не будуць належным чынам расследаваныя, ніхто і ніколі не зможа быць упэўнены, што задзейнічаныя схемы маніпуляцыі ўлады не аказалі вырашальнага ўплыву на вынікі выбараў. Акцыя пратэсту вельмі важная. Мы будзем там, дзе будуць нашы выбаршчыкі, як былі раней і будзем у будучыні», — сказаў Гахарыя.

Мамука Хазарадзэ, бізнесовец і адзін з лідараў «Моцнай Грузіі», заявіў: «Гэтыя выбары былі сфальсіфікаваныя ў выніку спецаперацыі паводле расійскага сцэнару, і мы не дазволім Бідзіне Іванішвілі вярнуць гэтую краіну ў логава Расіі».

Аднак, паводле тлумачэння прэзідэнта Саламэ Зурабішвілі, міжнародныя назіральнікі не публікуюць канчатковыя ацэнкі ў гэтак сціснутыя тэрміны.

«Міжнародныя назіральныя місіі не робяць заяў аб незаконным правядзенні выбараў адразу пасля выбараў, паколькі да іх паступае шмат інфармацыі, якую трэба сістэматызаваць. Назіральнікі вельмі выразна паведамілі пра інцыдэнты. Інфармацыя, якую я атрымала пра шматлікія выпадкі падтасовак, прымусіла мяне выступіць з заявай, у якой я не прызнаю вынікі выбараў. Іх вынікі супярэчаць тэндэнцыі ўсіх апытанняў, якія праводзіліся ў гэтай краіне, асабліва пасля прыняцця закона аб «замежных агентах» і вулічных пратэстаў, якія паказваюць, што людзі хочуць працягваць еўрапейскі шлях развіцця. Гэта сфальсіфікаваныя выбары, і я думаю, што грузінскі народ пацвердзіць гэтую ацэнку на вуліцы», — заявіла Саламэ Зурабішвілі ў інтэрв'ю Deutsche Welle.

Выбары — апошні шанец. Як Грузія, 70% насельніцтва якой хоча ў ЕС, разварочваецца ў бок Крамля

Ці збярэцца на пасяджэнне новы парламент?

Таксама застаецца спрэчным пытанне аб пачатку працы парламента. Лідар партыі «Справядлівасць» і паплечнік прэзідэнта Эка Беселія патлумачыла працэдуру склікання першай сесіі парламента:

«Прэзідэнт прызначае першае пасяджэнне, і калі яна не скліча гэтую сесію, то парламент не можа быць скліканы, так напісана ў Канстытуцыі. І калі ўлада будзе трактаваць Канстытуцыю гэтак жа адвольна, як правяла выбары, нас ужо нішто не павінна здзіўляць», – кажа Беселия.

Сапраўды, у артыкуле 38 Канстытуцыі Грузіі гаворыцца, што першае пасяджэнне новаабранага парламента праводзіцца не пазней, чым на 10-ы дзень пасля афіцыйнага абвяшчэння вынікаў выбараў. Першае пасяджэнне прызначаецца прэзідэнтам Грузіі. Парламент мае права прыступіць да працы на першай сесіі, калі на ёй прысутнічае большасць ад поўнага складу парламента. Парламент набывае ўсе паўнамоцтвы з моманту прызнання паўнамоцтваў дзвюх трацін членаў парламента. З гэтага моманту спыняюцца паўнамоцтвы парламента папярэдняга склікання.

У Грузіі будзе палітычны крызіс? Апазіцыйныя партыі адмаўляюцца атрымліваць мандаты дэпутатаў

Іраклій Кабахідзэ: Першае пасяджэнне парламента пройдзе ў звычайным рэжыме

«Грузінская мара» лічыць, што гэтая калізія цалкам пераадольная. Са слоў спікера парламента Шалвы Папуашвілі, апазіцыі давядзецца змірыцца са сваёй доляй:

«Яны лічаць грузінскіх выбаршчыкаў дурнямі. Няпраўда, што яны здымуць свае спісы і парламент стане легітымным. Парламент збярэцца і прызнае паўнамоцтвы 150 дэпутатаў большасцю галасоў. Апазіцыя рана ці позна ўвойдзе ў парламент, грузінскі народ ужо бачыў гэтае кіно! Адзінае, да чаго можа прынесці іх акцыя, гэта хваляванне, гвалт, што мы бачылі шмат разоў», — перасцярог Шалва Папуашвілі.

Як адбываліся фальсіфікацыі?

На гэтым фоне назіральныя арганізацыі апублікавалі звесткі аб масавай фальсіфікацыі выбараў. Як паведаміла прадстаўніца маніторынгавай місіі «Мой голас» Лонда Таларая, выяўленая асноўная схема буйнамаштабнай фальсіфікацыі выбараў. Яна заклікала следчыя органы пачаць расследаванне.

Як было заяўлена на брыфінгу, схема фальсіфікацыі выбараў у дзень галасавання на выбарчых участках заключалася ў наступным. У некаторых выбаршчыкаў, якія прыйшлі на выбарчы ўчастак, у пашпарце або на пасведчанні асобы быў уклеены ліст паперы з напісаным на ім асабістым нумарам іншага чалавека. 

Акрамя таго, часта выбаршчыкі галасавалі з дапамогай фотакопіі пасведчання асобы ў тэлефоне. 

У фальшывых выбаршчыкаў на ўчастках былі дружалюбныя рэгістратары, якія хутка ўводзілі напісаны на паперы асабісты нумар у праверачную машыну. Такім чынам маса людзей па некалькі разоў галасавала на розных участках. 

Таксама было заяўлена аб выяўленні некалькіх іншых ашуканскіх схем на 189 выбарчых участках, агульная колькасць выбаршчыкаў на якіх перавышае 300 тысяч. 

Юрысты назіральных місій працягваюць працаваць над падачай дадатковых апеляцый па ануляванні вынікаў выбараў, пра што было заяўлена на брыфінгу.