У Грузіі завяршыліся парламенцкія выбары. «Грузінская мара» святкуе перамогу, але ёсць нюанс

У Грузіі завяршыліся парламенцкія выбары. Выбарчыя ўчасткі зачыніліся а 20:00 па мясцовым часе (а 19-й па Мінску).

Пасля абвяшчэння першых экзітполаў, перамогу святкуюць і кіруючая «Грузінская мара», і асноўныя апазіцыйныя партыі, адзначае newsgeorgia.ge.

У партыі ўлады давяраюць апытанням праўладнага тэлеканала «Імедзі», які паведамляе пра вынік партыі ўлады ў больш чым 56%. Апаненты ўладаў абапіраюцца на звесткі апытанняў апазіцыйных каналаў. Згодна з імі, апазіцыя атрымае ў парламенце большасць.

Экзітпол Edison Research, па замове апазіцыйнага тэлеканала Formulа

«Грузінская мара» — 40,9%; «Кааліцыя за перамены — Гварамія, Мелія, Гірчы, Дроа» — 16,7%; «Адзінства» («Нацыянальны рух», «Стратэгія Агмашэнебелі», «Еўрапейская Грузія») — 16,7%; «Моцная Грузія» («Лело», «За народ», «Плошча Свабоды», «Грамадзяне» — 10,3%; «Гахарыя — За Грузію» — 8,2%; «Гірчы» — 2,3%; «Альянс патрыётаў» / «Альт-інфа» — 2%; Лейбарысцкая партыя — 2%; іншыя партыі — 0,9%.

Паводле гэтых звестак, чатыры апазіцыйныя партыі атрымліваюць у парламенце 83 мандаты, а «Грузінская мара» — 67 мандатаў.

Экзіт-пол кампаніі Harrys X на замову апазіцыйнага тэлеканала Mtavari

«Грузінская мара» — 42%; «Кааліцыя за перамены — Гварамія, Мелія, Гірчы, Дроа» — 18%; «Адзінства» («Нацыянальны рух», «Стратэгія Агмашэнебелі», «Еўрапейская Грузія») — 13%; «Моцная Грузія» («Лело», «За народ», «Плошча Свабоды», «Грамадзяне») — 9%; «Гахарыя — За Грузію» — 8%.

Экзіт-пол кампаніі GORBI на замову праўрадавага тэлеканала «Імедзі»

«Грузінская мара» — 56,1%; «Кааліцыя за перамены — Гварамія, Мелія, Гірчы, Дроа» — 12,6%; «Адзінства» («Нацыянальны рух», «Стратэгія Агмашэнебелі», «Еўрапейская Грузія») — 11,6%; «Моцная Грузія» («Лело», «За народ», «Плошча Свабоды», «Грамадзяне») — 7%; «Гахарыя — За Грузію» — 4,8%; «Гірчы» — 3%; «Альянс патрыётаў» / «Альт-інфа» — 2,1%, іншыя партыі — 2,7%.

«Грузінская мара» тым часам ужо запускае ў Тбілісі салюты ў гонар сваёй перамогі, не чакаючы афіцыйных вынікаў, піша блогер Мікалай Леўшыц. Первыя вынікі выбараў між тым ЦВК пачне агучваць пасля 22 гадзін.

Выбары — апошні шанец. Як Грузія, 70% насельніцтва якой хоча ў ЕС, разварочваецца ў бок Крамля

Варта сказаць, што выбары праходзілі вельмі неспакойна. На шэрагу ўчасткаў фіксаваліся спробы подкупу выбаршчыкаў з бок, як мяркуецца, прадстаўнікоў «Грузінскай мары». Таксама мелі месца ўкіды бюлетэняў за дзейную ўладу і нават бойкі каля ўчасткаў. Таксама былі напады на незалежных журналістаў.

У Тбілісі, як паведамлялася, каля 150 чалавек уварваліся ў офіс апазіцыйнай партыя «Нацыянальны рух», у выніку інцыдэнту пацярпелі некалькі чалавек.

26 кастрычніка ў Грузіі праходзілі парламенцкія выбары. Участкі адкрыліся а 08:00 і зачыніліся а 20: 00. Права голасу мелі 3,5 млн грамадзян. Па стане на 18:00 яўка склала больш за 50%.

У выбарах удзельнічалі 18 партый, у тым ліку кіроўная «Грузінская мара», якая знаходзіцца ва ўладзе ўжо 12 гадоў.

150 дэпутатаў парламента ўпершыню абіраюць не па змяшанай, як раней, а цалкам па прапарцыйнай сістэме. Для праходжання ў заканадаўчы орган партыям неабходна пераадолець пяціпрацэнтны бар'ер.