Сацапытанне: Большасць грамадзян Грузіі лічаць закон аб «замежных агентах» непатрэбным

Большасць грамадзян Грузіі лічаць, што краіне не патрэбны скандальны закон аб празрыстасці, што быў ініцыяваны кіруючай «Грузінскай марай». 68% рэспандэнтаў сацапытання адказалі, што ён не патрэбны Грузіі.

Пра гэта сведчаць вынікі апытання грамадскай думкі, праведзенага кампаніяй Edison Research на замову тэлеканала «Формула», піша www.ekhokavkaza.com.

Апытанне праводзілася з 16 па 26 красавіка. Па прынцыпе выпадковай выбаркі ў маштабах Грузіі (за выключэннем акупаваных рэгіёнаў) апыталі 1000 паўналетніх грамадзян. Памылка выбаркі складае + / -3%. Узровень дакладнасці — 95%.

На пытанне аб эфектыўнасці заканадаўчай ініцыятывы, 68% рэспандэнтаў адказалі, што ён не патрэбны Грузіі. 32% палічылі яго патрэбным.

Паводле ўзроставых катэгорыях адказы размеркаваліся наступным чынам:

• 18–24 гадоў: 82% — « няма неабходнасці»;
• 24–34 гады: 74% — « няма неабходнасці»;
• 35–44 гады: 71% — « няма неабходнасці»;
• 45–54 гады: 66% — « няма неабходнасці»;
• 55–64 гады: 62% — « няма неабходнасці»;
• 65 гадоў і старэйшыя: 57% — «няма неабходнасці».

Іншыя ключавыя моманты:

• 65% рэспандэнтаў лічаць, што закон стане падставай для абмежавання дзейнасці НДА і апазіцыі.
• 69% апытаных упэўненыя, што ён узмоцніць уплыў Расіі на Грузію.
• 73% рэспандэнтаў лічаць, што ў выпадку прыняцця закона шанцы Грузіі на ўступленне ў ЕС знізяцца.

Парламент Грузіі ў трэцім чытанні прыняў законапраект аб «замежных агентах»

Сёння, 14 мая, грузінскі парламент прыняў у трэцім і канчатковым чытанні законапраект «Аб празрыстасці замежнага ўплыву», які справакаваў шматтысячныя пратэсты і беспрэцэдэнтную крытыку ў адрас уладаў Грузіі з боку заходніх партнёраў. Законапраект у трэцім чытанні падтрымалі 84 дэпутаты. 30 прагаласавалі супраць. 

У Тбілісі пратэстоўцы, якія сабраліся на мітынгу супраць закона аб замежных агентах ля парламента, сустрэлі прыняцце законапраекта свістам, гулам і стукам ва ўстаноўленыя ля парламента загароды. Пачаліся жорсткія затрыманні.

Паліцыя была ў масках, збівала пратэстоўцаў і ўжывала слезацечны газ. Лідар Антыакупацыйнага руху Давід Кацарава быў жорстка збіты пры затрыманні і трапіў у бальніцу з сур'ёзнымі траўмамі галавы.

У апазіцыйнай фракцыі «Адзіны нацыянальны рух» пасля прыняцця законапраекта заявілі, што пачынаюць байкот працы парламента. Аналагічнае рашэнне прынялі і дэпутаты «Лело для Грузіі».

Паводле www.ekhokavkaza.com, сацсетак