Служба бяспекі Украіны заявіла пра затрыманне агента беларускага КДБ

Служба бяспекі Украіны заявіла пра затрыманне агента беларускага КДБ. Контрвыведка СБУ затрымала яго на тэрыторыі Валынскай вобласці. Сцвярджаецца, што грамадзянін Беларусі вёў выведвальную дзейнасць.

«Ён быў завербаваны КДБ РБ і мэтанакіравана накіроўваўся на тэрыторыю нашай дзяржавы для выканання разведвальных заданняў і арганізацыі іншай супрацьпраўнай дзейнасці», — цытуе паведамленне СБУ REFORM.by.

Агент павінен быў весці збор інфармацыі пра сітуацыю ў памежным рэгіёне, у тым ліку пра стан абароненасці мяжы Украіны, парадак яе аховы, тэхнічнае аснашчэнне, колькасць асабістага складу Дзяржаўнай памежнай службы Украіны, а таксама падбіраць кампраметуючыя даныя на памежнікаў і мытнікаў. Агент меў намер прыцягнуць да працы супрацоўнікаў Дзяржпамежслужбы. Сярод заданняў затрыманага згадваецца таксама перапраўка зброі і тавараў двайнога прызначэння праз мяжу.

«Атрыманыя контрвыведкай СБУ звесткі сведчаць, што гэтая дзейнасць сярод іншага мела на мэце арганізацыю правакацый і стварэнне інфармацыйных падстаў для абвінавачанняў Украіны ў пастаўках зброі для дэстабілізацыі ўнутрыпалітычнай сітуацыі ў Рэспубліцы Беларусь», — сказана ў паведамленні СБУ.

Грамадзяніну Беларусі прад’яўлена падазрэнне ў злачынстве, прадугледжаным ч. 1 арт 114 («Шпіянаж») КК Украіны.

Гэта не першы шпіёнскі скандал паміж Беларуссю і Украінай. У кастрычніку 2017 года ў Мінску быў затрыманы ўкраінскі журналіст Павел Шаройка. Ён абвінавачваўся ў шпіянажы. Яго прысудзілі да васьмі гадоў зняволення. Да гэтага ў чэрвені 2017 года ва Украіне затрымалі беларускага грамадзяніна Юрыя Палітыку. Паведамлялася, што ён «у інтарэсах трэцяга боку» збіраў на тэрыторыі дзяржавы звесткі аб антытэрарыстычнай аперацыі ў Данбасе (якія з’яўляюцца дзяржаўнай таямніцай), а атрыманую інфармацыю зашыфраваў і захоўваў на карце памяці мабільнага тэлефона.

У 2019 годзе пасля сустрэчы Лукашэнкі і Зяленскага Шаройка і Палітыка былі вызваленыя і вярнуліся на радзіму.