Сусветныя цікавосткі: «Не вязі Пуціна з сабой», чаму туркменкам нельга за мяжу, юбілей серыялаў

Заклікі абмежаваць паездкі на асабістым транспарце паасобку ва Украіне, новыя забароны для жанчын у Туркменістане і новы скандал з-за Прарока  — пра гэта і іншае ў нашым дайджэсце кур'ёзаў свету.

Не вязі Пуціна з сабой!

На фоне росту коштаў на паліва ўкраінскія грамадскія актывісты прапанавалі новую незвычайную кампанію. Яе сэнс у тым, каб украінцы адмовіліся ад паездак паасобку на асабістым транспарце. Іншымі словамі, накіроўваючыся некуды, аўтамабіліст можа пад дарозе падабраць пасажыраў, якім трэба ехаць у тым жа кірунку. «Калі кожны скароціць спажыванне, гэта будзе вялізны эфект у маштабах усёй краіны. Тады мы зможам даць больш паліва тым, каму яно сапраўды патрэбнае, а, па-другое, мы паскорым стварэнне запасаў і на ўзроўні спажыўцоў, і на ўзроўні дзяржавы, якая ваюе», — сцвярджае адзін з аўтараў кампаніі.
Ці атрымаецца такі эфект, цяжка сказаць, аднак у любым выпадку падобная кампанія можа ўдарыць па коштах на таксі. Так, у Кіеве гэта паслуга з пачатку вайны падаражэла ўдвая.
Ініцыятары акцыі ў тым ліку ўказваюць на гістарычныя прыклады. У часы Другой сусветнай амерыканскі ўрад праводзіў падобную прапаганду па скарачэнні спажывання паліва. Прычым рабілася гэта вельмі арыгінальна. На запраўках вешаліся плакаты з надпісам «Калі ты едзеш адзін у машыне, ты вязеш з сабой Гітлера». Хутчэй за ўсё, нешта падобнае можна будзе хутка ўбачыць на білбордах уздоўж украінскіх аўташляхоў.
Па матэрыялах украінскай прэсы

75 гадоў серыялам

Нягледзячы на ​​шалёную папулярнасць серыялаў, іх аматары, напэўна, не здагадваюцца, што сёлета ўлюбёны жанр адзначае важны юбілей. Роўна 75 гадоў таму, у чэрвені 1947-га, у Штатах пачаліся здымкі першага серыялу, які называўся «Мэры Кэй і Джоні» (англ: “Mary Kay and Johnny”). Сюжэт сіткома быў засяроджаны вакол прыгод банкаўскага служачага і яго эксцэнтрычнай жонкі, якія вырашаюць рознага кшталту фінансава-побытавыя праблемы. Большая частка серыяла адбываецца ў іх кватэры ў Нью-Ёрку. Кожная серыя, якая выходзіла штодня, доўжылася прыкладна 15 хвілін. У тым жа годзе восенню серыял выйшаў на экраны канала CBS і пратрымаўся тры сезоны.
Цікава, што серыял увайшоў у гісторыю не толькі як піянер у сваім жанры. У ім упершыню была паказана сцэна, калі муж і жонка ляжаць у адным ложку. Застаецца дадаць, што серыялы, якія здымаліся пазней, часам мелі глабальную грамадска-палітычную ролю. Дастаткова згадаць сагу «Багатыя таксама плачуць», які зрабіў у экс-СССР сапраўдную рэвалюцыю ў тэлевізійным жанры. Урэшце, украінскі серыял «Слуга народа» забяспечыў Уладзіміру Зяленскаму перамогу на выбарах у 2019-м. Але ўсё пачыналася з сціплага «Мэры Кэй і Джоні».
По матэрыялам амерыканскай прэсы

І зноў скандал з-за Прарока

Здавалася, пасля гісторыі з рэдакцыяй Charlie Hebdo, якую ў 2015-м з-за карыкатур на прарока Мухамеда расстралялі рэлігійныя фанатыкі, ніхто не рызыкне чапаць тонкую тэму пра заснавальніка ісламу. Аднак у Вялікабрытаніі знайшліся смельчакі, якія знялі фільм «Жанчына з нябёсаў» пра Фаціму, дачку Мухамеда. Фільм павінен быў выйсці на экраны якраз у чэрвені, але не гэтага не адбылося. Кінатэатры па ўсёй Вялікабрытаніі адмяняюць паказы фільма з-за рэакцыі раз'юшаных мусульман. Цікава, што сцэнар фільма быў напісаны знаўцам ісламу. Гэта нейкі мула, які нарадзіўся ў Кувейце і пражывае ў Вялікабрытаніі. Але ёсць нюанс: у фільме, які зняты на базе сцэнара згаданага мулы, распавядаецца гісторыя ісламу з шыіцкага пункту гледжання. А менавіта — прасоўваецца ідэя аб тым, што суніцкія халіфы ўзурпавалі вучэнне Мухамеда. Для гэтага яны, нібыта, у прыдачу забілі Фаціму. Такім чынам, насамрэч атрымліваецца, што, патрабуючы забароны карціны, адна фракцыя мусульманскай абшчыны імкнецца падвергнуць цэнзуры іншую. Зрэшты, у тых, хто патрабуе забароны, свае аргументы. Так ці інакш, на экране прысутнічае Айша — маці Фацімы і жонка Мухамеда. А гэта, на іх думку, ні што іншае як здзек з рэлігіі.
Па матэрыялах брытанскай прэсы

Жанчына як падрыў рэпутацыі краіны

Туркменская апазіцыйная прэса піша пра новы пакет законаў адносна жанчын, якія збіраецца прыняць мясцовы парламент. Нагадаем, апошнім часам у гэтай сферы з“явілася вельмі шмат забаронаў. Гэтак, прызнана па-за законам «абліпальнае» адзенне. Жанчынам настойліва рэкамендавана апранацца толькі ў нацыянальныя сукенкі. Забаронена фарбаванне валасоў. Знаходжанне жанчыны па-за домам пасля 8 вечара «падлягае высвятленню». Для выхаду на вуліцу павінна быць прычына. Найбольш камічная сітуацыя склалася ў галіне барацьбы з павелічэннем вуснаў (гэта таксама па-за законам). На вуліцах туркменскіх гарадоў спецыяльныя патрулі правяраюць у жанчын рукамі (!), ці не павялічаны іхнія вусны.
Частка з гэтых законаў ужо ўступіла ў сілу, іншыя прымяняюцца на практыцы неафіцыйна, але з яшчэ большым імпэтам.
Ну і, нарэшце, у найбліжэйшыя дні чакаюць эпічнага прарыву. Меджліс Туркменіі абмяркоўвае поўную забарону на выезд жанчын за мяжу, паколькі яны гэтым самым... «падрываюць рэпутацыю краіны». А паколькі парламент у Туркменіі хутчэй дэкаратыўны орган, няма сумневаў што за гэтай ініцыятывай стаіць новы прэзідэнт Сердар Бердымухамедаў. «Чым яму жанчыны насалілі?», — задаюцца пытаннем многія каментатары на форумах.
Па матэрыялах туркменскай прэсы