У Іране пакаралі смерцю яшчэ двух удзельнікаў пратэстаў

У Іране былі павешаныя яшчэ два ўдзельнікі антыўрадавых пратэстаў. Пра гэта паведамляе судовае інфармагенцтва Ірана Mizan.

22-гадовага Махамада Мехдзі Карэмі і 39-гадовага Сейеда Махамада Хасейні прызналі вінаватымі ў забойстве супрацоўніка Басідж, народнага падраздзялення Корпуса вартавых ісламскай рэвалюцыі (КВІР). Па гэтай справе да смяротнага пакарання прысудзілі яшчэ траіх удзельнікаў пратэстаў.

Як сцвярджае суд, 12 лістапада пратэстоўцы жорстка збілі і зарэзалі бяззбройнага Сейеда Рухолу Аджаміяна«толькі таму, што ён быў апрануты ў форму Басідж». Сілавік, як сцвярджае следства, дапамагаў расчысціць дарогу, заблакаваную мітынгоўцамі.

Карэмі і Хасейні прызналі сваю віну ў судзе. Пры гэтым адвакат апошняга раней паведамляў, што яго падабароннага катавалі падчас зняволення.

«Я сустрэўся з Хасейні ў турме Карадж, ён плакаў, калі распавядаў пра катаванні. Яму заплюшчылі вочы, звязалі рукі і ногі, білі нагамі па галаве і катавалі токам. Прызнанні, выбітыя пад катаваннямі, не маюць законнай сілы», — пісаў ён.

Праваабаронцы заявілі, што іранскі ўрад спрабуе з дапамогай пакаранняў смерцю запалохаць пратэстоўцаў.

«Гэтых людзей не пакаралі смерцю пасля судовага працэсу, іх лінчавалі. З моманту арышту іх лічылі вінаватымі без шанцаў даказаць сваю недатычнасць, таму што справы супраць іх былі палітычна матываваныя. Ісламская Рэспубліка выкарыстоўвае пакаранні і смяротную сілу супраць вулічных пратэстоўцаў, каб усяліць жах у сэрцы насельніцтва і здушыць надзеі іранскага народа і яго заклікі да пераменаў», — сказаў выканаўчы дырэктар арганізацыі Centre for Human Rignhts in Iran Хадзі Гаемі.

Такім чынам, у Іране пакаралі смерцю ўжо чатырох удзельнікаў пратэстаў. У пачатку снежня былі павешаны Маджыд Рэзу Рахнавард і Махсен Шэкары. Ім абодвум было па 23 гады.

У Іране за падтрымку пратэстаў затрымалі адну з самых вядомых акторак

Судовая сістэма Ірана прысудзіла больш за 20 чалавек да смяротнага пакарання пасля пратэстаў, якія пачаліся ў верасні пасля смерці пад вартай 22-гадовай Махсы Аміні. Раней паліцыя нораваў затрымала Аміні за тое, што тая нібыта насіла хіджаб або хустку «няправільна».

У краіне прайшлі найбуйнейшыя масавыя пратэсты з часоў рэвалюцыі 1979 года. Яны распаўсюдзіліся на 160 гарадоў ва ўсёй 31 правінцыі краіны. Інфармацыйнае агенцтва праваабаронцаў (HRANA) заявіла, што прынамсі 475 пратэстоўцаў былі забітыя і 18 240 затрыманыя. Таксама паведамлялася аб гібелі 61 супрацоўніка службы бяспекі.