Дэфіцыт тавараў у Міністэрстве гандлю тлумачаць "адаптацыйным перыядам"

Дэфіцыт некаторых тавараў у магазінах звязаны з "адаптацыйным перыядам", заявіла намеснік міністра гандлю Беларусі Ірына Наркевіч на сённяшняй прэс-канферэнцыі ў Мінску.



"Напэўна, у магазіне крокавай даступнасці, сапраўды, можа не быць баклажанаў, але гэта не таму, што яны зніклі, — падкрэсліла Наркевіч. — Зараз сітуацыя крышку перабудовачная, адаптацыйная, таму мы робім усё для таго, каб вывяраць гэтыя пазіцыі з аптавікамі. Мы працуем над тым, каб імпарцёр прывёз тавар і даў не толькі ў буйную розніцу, а дапамог маленькім магазінам крокавай даступнасці". 

"Вядома, вы хочаце атрымаць увесь тавар у магазіне крокавай даступнасці, гэта разумна, але па ходу зайдзіце з працы ў іншы магазін, дзе памідораў, якіх не хапае, дастаткова", — дадала намеснік міністра. 

Паводле яе слоў, звужэнне асартыменту некаторых тавараў залежыць ад многіх фактараў: прывязкі да валютнага кошыка, сусветнага крызісу, эканамічнай сітуацыі ў Расіі. "Мы ж не на Месяцы жывем. Урад дакладна адсочвае сітуацыю і потым прымае рашэнні", — сказала Наркевіч. 

Нагадаем, 19 снежня 2014 года Савет міністраў прыняў пастанову № 1207, якой устанавіў бестэрміновы мараторый на рост цэн. У той жа дзень у краіне рэзка падаражэла валюта. З-за гэтага імпартныя пастаўкі ў Беларусь сталі стратнымі, што прывяло да дэфіцыту некаторых тавараў. 

15 студзеня 2015 года Міністэрства гандлю і Міністэрства эканомікі апублікавалі растлумачэнне да пастановы № 1207, якой фактычна дазволілі вытворцам, пастаўшчыкам і рознічнаму гандлю павышаць адпускныя цэны на імпартныя тавары або іх імпартны складнік.
Аляксандр Ярашэвіч, БелаПАН