Галоўнае — не прызнавацца ў правале. Беларускія цэментавыя заводы зноў чакае мадэрнізацыя

За апошнія два дзясяткі гадоў Беларусь выдаткавала мільярды долараў на тое, каб стаць цэментнай супердзяржавай. Не дапамагло. І вось цяпер цэментавыя заводы зноў збіраюцца мадэрнізаваць.

Па словах кіраўніка Беларускай цэментнай кампаніі Аляксандра Даўгяла, у бліжэйшыя пяць гадоў будзе праведзена маштабная мадэрнізацыя галіны. Усяго мадэрнізаваць збіраюцца 14 прадпрыемстваў, уключаючы тры ўласна цэментныя заводы, піша Plan B.

«Асноўная задача, якая будзе вырашана ў працэсе маштабнай мадэрнізацыі, — гэта зніжэнне сабекошту прадукцыі», — паведаміў дырэктар.

Для беларускіх цэментных заводаў зніжэнне сабекошту — вельмі актуальнае пытанне. Таму што так у цэментных заводаў усё добра. У прынцыпе цэментавыя заводы магу пахваліцца літаральна па ўсіх паказчыках. Яны і выхваляюцца.

Як паведаміў Даўгяла, летась загрузка вытворчых магутнасцяў у цэментнай галіне склала 98,2 працэнта. Вырабілі амаль пяць мільёнаў тон цэменту. Экспарт павялічыўся на 30 адсоткаў да 2,3 мільёнаў тон. У першым паўгоддзі гэтага года пастаўкі цэменту ў Расію выраслі на 3,5 адсоткі, да 1,2 мільёнаў тон.

Гэта значыць, усё ў цэментных заводаў добра. Ні аднаго сумнага сюрпрызу.

Мільярд, закатаны ў цэмент

За выключэннем дробязі.

Па неверагодным збегу неспрыяльных жыццёвых абставінаў, поспехі цэментнай галіны ніяк не адбіваюцца на фінансавым стане завода. Дакладней, адбіваюцца. Яшчэ як адбіваюцца. Але толькі чамусьці зусім не так, як гэтага б хацелася.

Страты «Крычаўцэменшыфера» летась выраслі ў чатыры разы і склалі 120 мільёнаў рублёў. «Краснасельскбудматэрыялы» падвоілі страты да 55 мільёнаў. І толькі Беларускі цэментны завод іх скараціў на 16 адсоткаў. Але прыбытку ў Беларускага цэментнага завода ўсё роўна не атрымалася.

Працэнты па гэтых даўгах з 2019 года плаціць Мінфін з дзяржаўнага бюджэту. У канцы кожнага года ўрад прымае спецыяльную пастанову аб кампенсацыях для цэментнай галіны.

Але насамрэч 420 мільёнаў рублёў — гэта толькі тыя даўгі, якія немагчыма схаваць. Якія ўлады афіцыйна прызнаюць за цэментнымі заводамі. Таму што калі лічыць па законах рынку, а не па паняццях, то даўгоў у заводаў атрымаецца значна больш.

Мадэрнізацыяй цэментных заводаў беларускія ўлады займаюцца ўжо дваццаць гадоў. А за дваццаць гадоў можна выдаткаваць шмат грошай. Было б жаданне. Колькі выдаткавалі агулам, ніхто насамрэч не ведае. Падазраю, не ведаюць нават беларускія ўлады.

І вось беларускія цэментныя заводы ладзяць новую мадэрнізацыю.

Таму што штогадовыя ўрадавыя падачкі на кампенсацыю банкаўскіх працэнтаў не адпавядаюць, вядома, маштабам і амбіцыям галіны. Таму што галоўнае ў правальных мегапраектах што? 

Галоўнае — ніколі не прызнаваць, што яны праваліліся. І не спыняцца.

«Цэментная мадэрнізацыя». Рабочыя ААТ «Краснасельскбудматэрыялы» скардзяцца на маленькую зарплату