Кожны трэці беларус не робіць буйных пакупак, хоць заробкі выраслі
Сярод даных, публікацыя якіх знікла ў апошні час, — пашыраныя звесткі аб зберажэннях і пакупніцкіх паводзінах беларусаў.
Раней Нацбанк рэгулярна дзяліўся вынікамі апытання, дзе было відаць, якія віды буйных пакупак робіць насельніцтва, і ці лічаць наогул жыхары Беларусі той ці іншы перыяд спрыяльным часам, каб рабіць значныя выдаткі, піша тэлеграм-канал «Вашы грошы».
Ужо тройчы мы праводзілі апытанні сярод нашых чытачоў, каб запоўніць гэты прабел у інфармацыі. Пакуль відавочна, што нашы дадзеныя ў цэлым адпавядаюць тым, якія раней адсочваў і публікаваў Нацбанк. І нягледзячы на тое, што наша апытанне не прэтэндуе на рэпрэзентатыўнасць, дынаміка адказаў дазваляе рабіць некаторыя цікавыя высновы.
Глядзіце таксама
Па-першае, як раней паказвалі і дадзеныя Нацбанка, траціна беларусаў за апошнія тры месяцы не рабіла буйных пакупак. Хоць заробкі нават у доларавым выражэнні цяпер знаходзяцца на гістарычных максімумах.
Па-другое, прыкметна выраслі выдаткі на кампутарную і тэлефонную тэхніку. Паводле нашага апытання, у студзені такія выдаткі мела амаль чвэрць рэспандэнтаў.
Апытанні Нацбанка ў канцы 2021 года да такіх адносілі толькі 17% апытаных. Рост выдаткаў тут можа сведчыць аб тым, што санкцыі ўсё ж такі дзейнічаюць: наўпрост — зніжаючы асартымент прадукцыі, і ўскосна, робячы даражэйшай тую тэхніку, якая больш доўгімі шляхамі з'яўляецца на прылаўках.
Глядзіце таксама
Зрэшты, тое, што апошняе апытанне праходзіла ў студзені, таксама магло адыграць сваю ролю — сярод пакупак да зімовых святаў нярэдка была кампутарная тэхніка і тэлефанія.
Па-трэцяе, рэзкае зніжэнне выдаткаў на адпачынак і паездкі можа быць звязана з сезоннасцю.
Аднак, трэба ўлічыць, што цяпер многія зімовыя курорты, нават тыя, якія знаходзяцца адносна блізка і не моцна б'юць па кашальку, недаступныя беларусам з-за праблем з візамі, чэргаў на межах і адсутнасці звыклага авія або чыгуначнага злучэння.
