Сумнае дасягненне: Беларусь на чацвёртым месцы ў Еўропе па выдатках на ежу

Такім дасягненнем ганарыцца не выпадае, аднак Беларусь уваходзіць у пяцёрку еўрапейскіх краін, дзе выдаткі на набыццё прадуктаў харчавання найбольш істотна адбіваюцца на сямейным бюджэце. Горш справы толькі ў Малдовы і Казахстана, амаль гэтак жа — у Македоніі.

Паводле новага рэйтынгу, купля прадуктаў харчавання найменш значна адбіваецца на сямейным бюджэце жыхароў Люксембурга, Нідэрландаў і Вялікабрытаніі. Насельніцтва Паўночнай Македоніі, Малдовы і Казахстана, наадварот, траціць на ежу значныя сумы — больш за 37% усіх сваіх выдаткаў.

Паводле звестак агенцтва РІА «Навіны», выдаткі ў Беларусі на ежу ў сярэднім складаюць 37,6% ад сямейнага бюджэту. І хоць кажуць, нібы ў нашай краіне шкодныя звычкі каштуюць не так дорага, доля выдаткаў сярэднестатыстычнага беларуса на алкаголь і тытунь складае 2,5% ад заробку. Гэты паказчык знаходзіцца паміж узроўнямі Харватыі і Мальты — гэта значыць, у сярэдзіне спісу.

Самую нізкую долю выдаткаў на гэтыя тавары маюць Люксембург, Германія, Партугалія, Кіпр і Іспанія. У пералічаных краінах жыхары выдаткоўваюць на алкаголь і тытунь не больш за 1,8% ад сваіх спажывецкіх расходаў. Найбольш высокая доля выдаткаў на шкодныя звычкі ў Румыніі (8,1%), Фінляндыі (5,3%) і Балгарыі (5%).

Доля выдаткаў беларусаў на вольны час і культуру складае 3,6%, а доля выдаткаў на кавярні, рэстараны і гатэлі — 2,8%. Па гэтых паказчыках жыхары Беларусі займаюць, адпаведна, 7-е і 5-е месцы з канца.

Цукар-пясок за год падаражэў на 50%. На што яшчэ выраслі цэны?

Паводле Thinktanks.by