Цукар-пясок за год падаражэў на 50%. На што яшчэ выраслі цэны?

У дзясятцы тавараў, што найбольш падаражэлі — цукар, цытрусавыя, бананы, шампуні. Затое патаннела капуста, буракі ды грэчка!

Паводле звестак Белстата, у снежні 2022 года гадавы прырост спажывецкіх цэн у Беларусі склаў 12,8%. Прадукты харчавання падаражэлі на 13,8%, нехарчовыя тавары — на 13,7%, паслугі — на 10%. Якія тавары і паслугі больш за ўсё выраслі ў цане па выніках 2022 года, падлічыла myfin.by.

Што падаражэла?

У гадавым вылічэнні (снежань 2022 года да аналагічнага месяца 2021 года) больш за ўсё падаражэў цукар-пясок. Яго кошт павялічыўся на 50,17%. Далей ідуць бананы і цытрусавыя, кошт якіх вырас за год на 49,19% і 47,03% адпаведна. Нехарчовыя тавары таксама прадэманстравалі рост, асабліва парфумерна-касметычная прадукцыя (у тым ліку тавары для асабістай гігіены).

Першая дзясятка самых падаражэлых тавараў выглядае так:

1. цукар-пясок (+50,17%);
2. бананы (+49,19%);
3. плады цытрусавых (+47,03%);
4. шампунь (+42,99%);
5. масла маторнае (+41,44%);
6. перац салодкі (+41,05%);
7. дэзадарант (+39,12%);
8. падгузнікі, гігіенічныя пакеты (+37,92%);
9. мыйныя сродкі для аўтамабіляў (+37,50%);
10. лак, бальзам для валасоў (+37,04%).

Акрамя таго, прыкметна дадалі ў кошце запчасткі да транспартных сродкаў (+36,92%) і легкавыя аўтамабілі (+33,43%), харчовая сода (+33,88%), распушчальная кава (+29,61%), морапрадукты (+26,77%), шампанскае (+24,51%).

Рост коштаў назіраўся па такіх таварных групах, як папярова-белавыя тавары (на 30,02%), тавары бытавой хіміі (на 28,87%), тытунёвыя вырабы (на 26,05%), парфумерна-касметычныя тавары (на 25,61%), сінтэтычныя мыйныя сродкі (на 23,25%).

З паслуг найбольшы рост за год паказалі паслугі фотаатэлье (+26,21%), рамонт ювелірных вырабаў (+24,19%) і гадзіннікаў (+21,14%).

Канкрэтна ў снежні 2022 года (у адносінах да папярэдняга месяца) выраслі цэны на гародніну і садавіну — на 14,46% і 4,76% адпаведна: свежыя агуркі сталі даражэйшымі на 43,48%, памідоры — на 17,36%, вінаград — на 15,27%, грушы — на 11,62%, яблыкі — на 8,90%.

Павялічыўся таксама кошт паслуг пасажырскага транспарту, у тым ліку паветранага — на 14,63%. Паслугі страхавання легкавога аўтатранспарту выраслі на 14,57%, міжнароднага турызму — на 3,67%, рытуальныя паслугі — на 4,60%.

Што стала танней?

Калі казаць пра тавары, то больш за ўсё ў гадавым выражэнні знізіліся цэны на некаторую гародніну, а таксама на шэраг нехарчовых тавараў, у тым ліку на канкрэтныя прадметы адзення і мэблі.

У топ-10 тавараў па зніжэнні цэн увайшлі:

1. белакачанная капуста (-57,59%);
2. буракі (-34,92%);
3. бульба (-29,84%);
4. морква (-24,13%);
5. часнок (-11,78%);
6. вінаград (-8,93%);
7. рэпчатая цыбуля (-6,14%);
8. гарнітур, сарафан, камплект для дзяўчынкі (-4,85%);
9. піламатэрыялы іглічныя абразныя і неабразныя (-4,84%);
10. крупы грачаныя (-3,78%).

На гародніну ў цэлым цэны знізіліся на 5,83%. Таннейшымі сталі набор мэблі для спальні (на 3,58%), гарнітур для пярэдняга пакоя (на 2,93%), бялізна для нованароджаных і дзяцей ясельнага ўзросту (на 2,40%), школьны касцюм (на 2,20%), натуральны мёд (на 1,48%) і некаторыя іншыя тавары.

Што тычыцца паслуг, то цэны ўпалі толькі на ацяпленне (-4,06%), а кошт паслуг па страхаванні будынкаў, якія належаць грамадзянам, застаўся на ранейшым узроўні. Астатнія паслугі выраслі ў цане.

За снежань 2022 года ў адносінах да лістапада мацней за ўсё патаннелі салодкі перац — на 6,64%, грэчка — на 5,78%, сантэхнічная арматура — на 5,50%, музычныя цэнтры — на 4,47%, боты ці чаравікі з футрам — на 4,13%, іглічныя піламатэрыялы — на 4,03%.

Тэхнічнае абслугоўванне транспартных сродкаў (легкавых аўтамабіляў) стала танней на 0,85%, кошт медыцынскіх паслуг паменшыўся на 0,08%. Цэны на шэраг іншых паслуг (гарадская тэлефонная сувязь, паслугі дашкольных устаноў, паслугі фотаатэлье) засталіся на тым жа ўзроўні, што і ў лістападзе.