Унёскі ў фонд на выпадак банкруцтва прадпрыемстваў могуць зрабіць абавязковымі

Рашэнне аб стварэнні ў краіне гарантыйнага фонду на выпадак банкруцтва прадпрыемстваў, узносы ў які павінны будуць плаціць практычна ўсе камерцыйныя арганізацыі краіны, можа быць прынятае ўжо ў 2017 годзе. Пра гэта паведамляе прэс-служба Федэрацыя прафсаюзаў Беларусі (ФПБ), якая выступіла ініцыятарам стварэння такога фонду.

6835e5e8d80abc5920ef617a0acdb90d.jpg


На пасяджэнні прэзідыума савета ФПБ, якое адбылося ў канцы мінулага тыдня, было абвешчана аб стварэнні міжведамаснай рабочай групы для прапрацоўкі канкрэтных механізмаў і параметраў функцыянавання гарантыйнага фонду. "Сістэмы страхавання рызык нявыплаты зарплаты пры банкруцтве прадпрыемства дазваляюць задавальняць патрабаванні работнікаў да прадпрыемстваў-банкрутаў аб выплаце заработнай платы за кошт спецыяльных мэтавых гарантыйных фондаў, што фінансуюцца ўзносамі ўсіх прадпрыемстваў. Такія меры забяспечваюць больш высокую сацыяльную абароненасць працоўных", — цытуе прэс-служба ФПБ начальніка галоўнага ўпраўлення сацыяльнага партнёрства і працоўных адносін апарату савета федэрацыі Максіма Каршакевіча.
Мяркуецца, што фонд будзе фарміравацца за кошт штомесячных адлічэнняў прадпрыемстваў, якія трапляюць пад дзеянне закона "Аб эканамічнай неплацежаздольнасці (банкруцтве)". Варта адзначыць, што пад дзеянне згаданага закона трапляюць у Беларусі практычна ўсе камерцыйныя арганізацыі.
Як паведамлялася раней, тэма стварэння гарантыйнага фонду ўзнімалася ў маі падчас круглага стала, арганізаванага ФПБ. На гэтым мерапрыемстве быў прэзентаваны літоўскі вопыт функцыянавання такога фонду, узносы ў які таксама плацяць практычна ўсе камерцыйныя арганізацыі краіны.
У гэты час Федэрацыя прафсаюзаў прапануе на дзяржаўным узроўні правесці разлікі, неабходныя для вызначэння велічыні узносаў, якія бізнес павінен будзе выплачваць у гарантыйны фонд на выпадак банкруцтва прадпрыемстваў. "Зразумела, патрабуюцца дэталёвыя разлікі сум адлічэнняў. І гэтым павінны займацца спецыялісты. Але з вопыту іншых краін такія адлічэнні не перавышаюць дзясятых доляў працэнта ад фонду заработнай платы", — цытуе Максіма Каршакевіча прэс-служба ФПБ.
Паводле ацэнак ФПБ, сёння дастаткова востра паўстае праблема забеспячэння поўнай і эфектыўнай занятасці, усё больш прадпрыемстваў аказваюцца не ў стане своечасова выплачваць заработную плату. "Працэсы мадэрнізацыі і рэструктурызацыі эканомікі, што адбываюцца, могуць узмацняць такія сацыяльныя рызыкі, як рызыка беспрацоўя і рызыка нявыплаты заработнай платы пры банкруцтве прадпрыемства. Практыка існавання такіх фондаў у свеце шырока распаўсюджаная. Мы вывучалі вопыт Літвы, Эстоніі, Бельгіі і іншых краін і бачым, што гэта рэальны ахоўны механізм як для работнікаў, так і для наймальнікаў", — падкрэсліў Каршакевіч.
Нагадаем, Міжнародны валютны фонд, да якога беларускія ўлады звярнуліся па новы крэдыт, прапануе правесці глыбокія рэформы ў сектары дзяржпрадпрыемстваў. Свае рэкамендацыі фонд абвясціў у Мінску падчас чэрвеньскай місіі.
Іншы крэдытор Беларусі, Еўразійскі фонд стабілізацыі і развіцця, ад якога беларускія ўлады ўжо атрымалі першы транш новага крэдыту, таксама рэкамендуе правесці рэфармаванне сектара дзяржпрадпрыемстваў Беларусі. Паводле ацэнак Еўразійскага банка развіцця, кіраўніка сродкаў еўразійскага фонду, залішняя занятасць ў сектары дзяржпрадпрыемстваў Беларусі складае 20%.
Дзмітрый Заяц, БелаПАН