Адыёзны тэлеграм-канал сілавікоў незнарок выдаў сваіх адміністратараў

На гэтым канале публікаваліся ў тым ліку відэа з затрыманымі па палітычных справах, адзначае «Н*ша Ніва». Канал, як і іншыя падобныя, не толькі парушае прэзумпцыю невінаватасці, але і распальвае варожасць па прыкметах палітычных поглядаў, нацыянальнай і сэксуальнай прыналежнасці, зневажае нацыянальныя пачуцці беларусаў.

Гаворка ідзе пра канал «Обратная сторона». Дакумент са спісам вядоўцаў канала выпадкова выклаў туды нехта з адміністратараў.

Аказалася, што структура, якая адказвае за вядзенне канала, — гэта Упраўленне інфармацыі і грамадскіх сувязяў (УІГС) Міністэрства ўнутраных спраў. Падраздзяленне, якое за гэта адказвае, мае рускамоўную абрэвіятуру ОРІКС. Гэта новае падраздзяленне, назва, хутчэй за ўсё, расшыфроўваецца як аддзел па рабоце ў інфармацыйна-камунікацыйнай сферы ці аддзяленне па рабоце ў інтэрнэце і камунікацыйнай сферы.

Графік дзяжурстваў на канале склаў падпалкоўнік Сяргей Іванавіч Басько. Яму 45 гадоў і ён скончыў філфак БДУ у 2000 годзе, але пайшоў працаваць у міліцыю.

Сяргей быў аўтарам сайта МУС, прадстаўніком УУС Мінскай вобласці, а пасля пайшоў на павышэнне і загадвае цэлым аддзелам у УІГС.

Падчас пратэстаў у горадзе Жодзіне Басько выдаваў сябе спачатку за пратэстоўца, а пасля за аператара незалежных СМІ і таемна здымаў удзельнікаў пратэстаў.

Басько — старшы інспектар па асаблівых даручэннях. Але дакумент павінен падпісваць начальнік падраздзялення. Хто ж тады кіруе ОРІКС? Дакумент, які адміны міліцэйскага канала выпадкова злілі, быў створаны ў маі 2021 года карыстальнікам «Саша». У спісе дзяжурстваў ёсць Аляксандр Марчанка. Яго графа пустая — імаверна, ён у адпачынку. Можна меркаваць, што ён і ёсць начальнік аддзела.

Марчанка 38 гадоў, ён скончыў Акадэмію МУС. Працаваў у прэс-цэнтры транспартнай міліцыі, УІОС МУС, потым у прэс-цэнтры Мінаблвыканкама. «Выканаўчы. Дадуць загад — будзе выконваць», — кажуць пра яго.

У канале, за які адказвае ОРІКС, апроч крымінальных навін выкладаюць відэа з затрыманымі за палітыку і выкарыстоўваюць адпаведную лексіку. Беларускі нацыянальны сцяг там называюць «анучай», Калеснікаву — «алкагалічкай». У многіх палітычных пастах можна знайсці элементы распальвання нацыянальнай ці сацыяльнай варожасці або знявагі гонару, годнасці і дзелавой рэпутацыі.

Канал «Обратная сторона», як вынікае з графіку дзяжурстваў, вядзе толькі гэтае падраздзяленне, бо толькі яго супрацоўнікі дзяжураць па выхадных.

А вось маніторынгам недзяржаўных медыя (літара «М» у графіку) займаюцца розныя аддзелы. Кожны дзень (у тым ліку ў выходныя) выдзяляецца спецыяльны чалавек, які чытае анлайн-СМІ і тэлеграм-каналы па спісе: «Н*ша Ніва», «З*ркало», «N*xta» і г. д.

Аналагічныя падраздзяленні, якія займаюцца маніторынгам медыя, імаверна, ёсць і ў Міністэрстве абароны, і ў Адміністрацыі Лукашэнкі.

Сам канал быў створаны ў кастрычніку 2020 года, але меў іншы юзернэйм — propolice_by. Перайменаваўся ён у лютым 2022-га.