Аўтар «Прэсбола» пашкадаваў, што БТ не пачало красьці спартовыя трансляцыі раней
Аўтар «Прэсбола» Сяргей Вярсоцкі на старонках выдання выказаўся пра трансляцыю матчаў Адкрытага чэмпіянату Аўстраліі па тэнісе дзяржаўным тэлеканалам «Беларусь-5» з парушэннем аўтарскіх правоў. Пра гэта паведамляе «Тр*буна».
«Зусім раптоўна, без маштабных анонсаў і змяненняў у
праграме перадач тэлеканал «Беларусь 5» паказаў у запісе паўфінальныя матчы
Australian Open з удзелам Азаранкі і Сабаленкі. А пазней у прамым эфіры — і
пераможны фінал першай ракеткі Беларусі.
Айчынныя аматары тэніса не чакалі такога павароту падзей.
Усе два тыдні турніру яны глядзелі матчы на канале «Еўраспорт», якому,
уласна, і належалі асноўныя правы на паказ турніра ў Старым Свеце. З улікам таго,
што на «Беларусь 5» прафесійныя турніры не паказвалі ўжо даволі даўно, на
падобны сюрпрыз ніхто не разлічваў. Ды і самі журналісты не спяшаліся
растлумачыць сітуацыю. Толькі перад фіналам тэлеграм-канал Агенцтва
тэлевізійных навін намякнуў на прынцып трансляцыі сігналу. І паведаміў аб
адкрыцці нейкага рублёвага рахунку за гэты паказ.
Як аказалася, у Беларусі з 3 студзеня працуе закон пад
нумарам 241-3 «Аб абмежаванні выключных правоў на аб'екты». Гэты дакумент «дапускае выкарыстанне аб'ектаў інтэлектуальнай уласнасці без згоды
(дазволу) праваўладальніка або арганізацыі... з замежных дзяржаў, якія
ажыццяўляюць недружалюбныя дзеянні». Такімі аб'ектамі лічацца камп'ютарныя
праграмы, аўдыёвізуальныя і музычныя творы, перадачы арганізацый вяшчання.
Застаецца шкадаваць, што Палата
прадстаўнікоў, якая прыняла гэты закон, разгойдвалася так доўга, ратыфікаваўшы яго толькі 20 снежня. Спрацу яна больш аператыўна, беларускаму народу яшчэ ў лістападзе зладзілі б свята
футбола — тэлетрансляцыю ўсіх матчаў ЧС-2022», — напісаў Вярсоцкі.
Нагадаем, праз
санкцыі беларускае тэлебачанне не мае права на трансляцыю шмат якіх сусветных
спартыўных спасборніцтваў. І сапраўды, футбольны чэмпіянат свету напрыканцы
мінулага года ў Беларусі па тэлевізары не паказвалі. Заўзятары, каб пабачыць
гульні ЧС, былі вымушаны шукаць у сеціве пірацкія трансляцыі, альбо карыстацца
паказам на сайце ФІФА.
Пасля беларускія
тэлевізійшчыкі пачалі наўпрост красьці карцінку ў замежных тэлеканалаў. У
выпадку з Адкрытым чэмпіянатам Аўстраліі па тэнісе гэта была карцінка «Еўраспорта»,
лагатып якога ў Мінску перакрывалі лога канала «Беларусь 5». Пра рэакцыю на
гэта праваўладальнікаў з «Еўраспорта» нічога не вядома. Выглядае, што і надалей
БТ будзе займацца крадзяжом чужога, бо саромецца ўжо няма чаго.