Афіцыйна: Беларусь не гатовая да адмены смяротнага пакарання

Беларусь пакуль не гатова ратыфікаваць Другі факультатыўны пратакол да Міжнароднага пакту аб грамадзянскіх і палітычных правах, заявіў пастаянны прадстаўнік Беларусі пры ААН у Жэневе Юры Амбразевіч 9 кастрычніка на пасяджэнні Камітэта ААН па правах чалавека.

Прамая трансляцыя з пасяджэння вядзецца на сайце ААН.
Другі факультатыўны пратакол да МПГПП накіраваны на адмену смяротнага пакарання.
Амбразевіч адзначыў, што ў рамках Універсальнай перыядычнай справаздачы ААН Беларусі было рэкамендавана ратыфікаваць Другі факультатыўны пратакол.
«Мы гэтыя рэкамендацыі прынялі да ведама, але Беларусь пакуль да гэтага не гатовая, — сказаў Амбразевіч. — Гэта звязана з грамадскай думкай у нашай краіне па пытанні аб прымяненні смяротнага пакарання».
«Аднак мы не адхілілі гэтыя рэкамендацыі. Мы пакінулі магчымасць іх разгляду і далучэння да пратакола ў перспектыве ў разліку на тое, што грамадская думка будзе змяняцца», — дапоўніў пастаянны прадстаўнік Беларусі пры ААН у Жэневе.
Па словах Амбразевіча, апытанні грамадскай думкі паказваюць, што прыхільнікаў захавання смяротнага пакарання ў Беларусі ўсё яшчэ больш, чым тых, хто выступае за адмену гэтага віду пакарання.
8-9 кастрычніка на 124-й сесіі Камітэта ААН па правах чалавека (КПЧ) Беларусь упершыню за апошнія 20 гадоў прадставіла справаздачу аб выкананні Міжнароднага пакта аб грамадзянскіх і палітычных правах.
Акрамя афіцыйнай дэлегацыі ў слуханнях удзельнічаюць беларускія праваабаронцы, якія падрыхтавалі альтэрнатыўны даклад аб выкананні краінай пакта. У першай палове дня 8 кастрычніка яны прадставілі КПЧ свой даклад.
Беларусь застаецца адзінай еўрапейскай краінай, якая ўжывае смяротнае пакаранне. За апошнія 20 гадоў у краіне было расстраляна больш за 400 асуджаных да вышэйшай меры пакарання. Толькі адзін з асуджаных памілаваны кіраўніком краіны.
Еўрапейскія структуры і міжнародныя праваабарончыя арганізацыі неаднаразова заклікалі ўлады Беларусі да адмены смяротнага пакарання.
Адмена смяротнага пакарання з'яўляецца адной з найважнейшых умоў для сяброўства краіны ў Савеце Еўропы.
Паводле naviny.by