Гісторык Цімаці Снайдэр стане голасам Алеся Бяляцкага ў арт-інсталяцыі Андрэя Курэйчыка

Праграма Праваабарончага фонду (HRF) «Мастацтва ў пратэсте» прадстаўляе выставу «Галасы Новай Беларусі» вядомага беларускага драматурга і лектара Ельскага ўніверсітэта Андрэя Курэйчыка ў перакладзе Джона Фрыдмана. Выстава звяртае ўвагу на барацьбу беларускага народа супраць жорсткага дэспата, які, не скаваны ніякімі маральнымі абмежаваннямі, бязлітасна наступае на іншадумцаў.

«З 2020 года Аляксандр Лукашэнка пасадзіў за краты тысячы тых, хто выступаў супраць яго рэжыму. За апошнія тры гады Лукашэнка, які знаходзіцца ва ўладзе з 1994 года, падштурхнуў сотні тысяч беларусаў — ад фабрычных рабочых да ІТ-праграмістаў, ад нацыяналістаў да некалі палітычна нейтральных грамадзян — пакінуць родную краіну. У 2023 годзе гэтыя рэпрэсіі працягваюцца і толькі набіраюць тэмп», — адзначаецца ў прэзентацыі праекта.

«Галасы новай Беларусі» прадстаўляюць 16 маналогаў беларускіх палітвязняў, у тым ліку Марыі Калеснікавай, Алеся Бяляцкага, Мікалая Статкевіча, Марыны Золатавай і Ігара Лосіка. Адны з іх — звычайныя людзі, рэпрэсаваныя за выступы супраць жорсткага рэжыму і панеслі з-за гэтага цяжкія наступствы, іншыя — вядомыя беларускія апазіцыянеры, якія гадамі змагаліся з Лукашэнкам. На выставе гучаць галасы амерыканскіх акцёраў і вядомых выкладчыкаў Ельскага ўніверсітэта, у тым ліку вядомых амерыканскіх гісторыкаў Цімаці Снайдэра і Марсі Шор, філосафа Джэйсана Стэнлі, рэжысёра Юрыя Кардонскага і іншых.

Выстава будзе дэманстравацца ў чацвер, 15 чэрвеня, у SALT (размешчаная па адрасе Langkaia, 1, 0150 Oslo) падчас Форуму Свабоды ў Осла ў 2023 годзе.

«Калі дыктатура ўзмацняецца ва ўсім свеце, а рэжым Лукашэнкі працягвае рэпрэсіі супраць простых людзей у Беларусі, вельмі важна, каб мы працягвалі памятаць тых, хто пацярпеў ад рэпрэсіўных дыктатур», — адзначаюць аўтары выставы.

«Часам праўда не патрабуе нічога, акрамя таго, каб яе выказалі даслоўна», — падкрэслівае Андрэй Курэйчык.

OSLO FREEDOM FORUM 2023 — найбуйнейшы форум па правах чалавека ў свеце, які праводзіцца штогод у Осла, Нью-Ёрку і Тайбэі.

14 ліпеня 2021 года Алесь Бяляцкі разам з некалькімі калегамі па «В*сне» быў затрыманы пасля ператрусаў, праведзеных беларускімі сілавымі органамі ў больш як дзесяці арганізацыях грамадзянскай супольнасці і праваабарончых арганізацыях. 17 ліпеня яго перавялі ў СІЗА па сфабрыкаваным абвінавачанні ва ўхіленні ад выплаты падаткаў. У далейшым яму былі прад’яўлены абвінавачанні ў кантрабандзе і арганізацыі і фінансаванні дзеянняў, якія груба парушаюць грамадскі парадак.

У снежні 2022 года Алесь Бяляцкі быў уганараваны Нобелеўскай прэміяй міру разам з расійскай праваабарончай арганізацыяй «Мемарыял» і ўкраінскай праваабарончай арганізацыяй «Цэнтр грамадзянскіх свабод» — годная ўзнагарода за бясстрашную працу. 3 сакавіка 2023 года Алесь Бяляцкі быў асуджаны на 10 гадоў пазбаўлення волі разам з сябрамі рады «Вясны» Валянцінам Стэфановічам і Уладзімірам Лабковічам, якім прысудзілі, адпаведна, дзевяць і сем гадоў. Упершыню Алесь Бяляцкі апынуўся за кратамі ў 2011 годзе і правёў у няволі 1052 дні.