Палітвязень Аляксандр Францкевіч ужо амаль 2,5 месяца знаходзіцца ў ШІЗА

Грамадства

Палітзняволены актывіст анархісцкага руху Аляксандр Францкевіч ужо два з паловай месяцы знаходзіцца ў штрафным ізалятары калоніі ў Івацэвічах. Як стала вядома «Новаму Часу», нядаўна яму дадалі чарговыя суткі ШІЗА, адкуль ён мусіць выйсці толькі 15 чэрвеня. Таксама да палітвязня не пускаюць адваката.

Фота «В*сны»

Фота «В*сны»

Аляксандр Францкевіч пачаў адбываць «палітычнае пакаранне» ў Івацэвічах 25 сакавіка. Як стала вядома «НЧ», апошні ліст ад яго родныя атрымалі 29 сакавіка, калі ён знаходзіўся на каранціне.

Пасля каранціну Аляксандра змясцілі ў ШІЗА, дзе ён знаходзіцца дагэтуль. Прычыны такога рашэння адміністрацыі калоніі невядомыя.

Аляксандр Францкевіч праходзіў па палітычна матываванай крамінальнай справе «Рэвалюцыйнага дзеяння». Разгляд справы ў судзе цягнуўся больш за чатыры месяцы.

Усяго ў межах гэтай справы схапілі дзесяць чалавек.

Праваабаронцу Марфу Рабкову, валанцёра праваабарончага цэнтра «В*сна» Андрэя Чапюка, анархістаў Акіхіра Гаеўскага-Ханаду, Аляксандра Францкевіча, Аляксандра Казлянка, антырасіста Андрэя Марача, а таксама Паўла Шпетнага, Аляксея Галаўко, Даніла Чулю і Мікіту Дранца судзілі за падзеі 2016–2020 гадоў.

У выніку 6 верасня мінулага года суддзя Сяргей Хрыпач прысудзіў палітвязням сталінскія тэрміны зняволення, прызнаўшы іх вінаватымі больш чым па дзесяці крымінальных артыкулах:

  • Аляксандру Францкевічу — 17 гадоў калоніі ва ўмовах строгага рэжыму і штраф у памеры 700 базавых велічыняў (22 400 беларускіх рублёў, або звыш 8800 долараў);
  • Акіхіра Гаеўскаму-Ханаду — 16 гадоў калоніі ва ўмовах узмоцненага рэжыму і штраф у памеры 700 базавых велічыняў (22 400 беларускіх рублёў, або звыш 8800 долараў);
  • Марфе Рабковай — 15 гадоў калоніі ва ўмовах агульнага рэжыму і штраф у памеры 700 базавых велічыняў (22 400 беларускіх рублёў, або звыш 8800 долараў);
  • Аляксею Галаўко — 12 гадоў калоніі ва ўмовах узмоцненага рэжыму і штраф у памеры 700 базавых велічыняў (22 400 беларускіх рублёў, або звыш 8800 долараў);
  • Паўлу Шпетнаму, Мікіту Дранцу, Аляксандру Казлянку, Андрэю Чапюку — па 6 гадоў калоніі ва ўмовах узмоцненага рэжыму і штраф у памеры 500 базавых велічыняў (16 000 беларускіх рублёў, або звыш 6300 долараў);
  • Андрэю Марачу, Данілу Чулю — па 5 гадоў калоніі ва ўмовах узмоцненага рэжыму і штраф у памеры 500 базавых велічыняў (16 000 беларускіх рублёў, або звыш 6300 долараў).