«Здараюцца прыступы, губляе прытомнасць». Бацька Ксеніі Луцкінай — пра здароўе палітзняволенай дачкі
Бацька палітзняволенай журналісткі, асуджанай на доўгі тэрмін, распавёў «Народнай Волі» пра апошнія навіны ад дачкі і яе стан здароўя.
Фота з сацсетак
Ксенію Луцкіну,
якая ў 2020 годзе працавала ў Белтэлерадыёкампаніі, абвінавацілі ў змове з
мэтай захопу дзяржаўнай улады неканстытуцыйным шляхам. 28 верасня мінулага года
Мінскі гарадскі суд прысудзіў яе да 8 гадоў пазбаўлення волі.
Цяпер Ксенія знаходзіцца
ў Гомельскай калоніі №4. У пачатку года яна захварэла на двухбаковую пнеўманію
і змагалася з хваробай амаль увесь люты. Таксама ў Ксеніі дыягнаставалі
анкалогію, яна стаіць у чарзе на МРТ.
— Не было пакуль
ніякага абследавання, — кажа бацька журналісткі Алег Луцкін. — Хоць дачка
па-ранейшаму пачуваецца вельмі дрэнна.
Пару дзён таму
яна мне тэлефанавала, і я адмыслова ўдакладніў, ці вазілі яе на МРТ або не. На
жаль, не вазілі. Стаіць у чарзе на абследаванне — вось і ўсё, што вядома. Але
ўсе неабходныя лекі перадаём, Ксеніі дазволілі медыцынскую перадачу.
— Наколькі
вядома, па стане здароўя Ксенію вызвалілі ад працы ў прамзоне…
— Кажа, што вяжа
ў калоніі мачалкі. Натуральна, калі здароўе дазваляе. Перыядычна ў яе здараюцца
прыступы, тады губляе прытомнасць. Але свой план усё роўна выконвае.
— Па тэлефоне
рэгулярна размаўляеце?
— І па тэлефоне,
і па відэасувязі з сынам размаўляе. У красавіку таксама было доўгае спатканне.
Цяпер чакаем новай сустрэчы.
Ксенія Луцкіна
працавала ў Белтэлерадыёкампаніі, але сышла адтуль у 2020 годзе на хвалі
пратэстаў і далучылася да дзейнасці Каардынацыйнай рады. Супрацоўніцтва з ёй і
стала падставай для завядзення крымінальнай справы.
Журналістку
затрымалі ў снежні 2020-га па «справе Прэс-клуба» і абвінавацілі ў «нявыплаце
падаткаў». Пазней, калі гэту справу закрылі, на Луцкіну завялі новую. Яе
абвінавачвалі ў змове з мэтай захопу дзяржаўнай улады неканстытуцыйным шляхам.
Паводле версіі следства, яна ўвайшла «ў склад так званай Каардынацыйнай рады і ўзначаліла групу інфармацыйнага забеспячэння і супрацьдзеяння дзяржаўным
СМІ», займалася стварэннем «грамадскага беларускага інтэрактыўнага
тэлебачання».
За час
знаходжання за кратамі ў Ксеніі Луцкінай моцна пагоршылася здароўе:
абвастрылася бранхіяльная астма, павялічваецца пухліна ў мозгу — у 2014 годзе
ёй рабілі аперацыю і выдалілі дзве пухліны ў галаве. А 28 верасня 2022 года
Мінскі гарадскі суд прысудзіў журналістцы 8 гадоў зняволення.
Паводле інфармацыі Беларускай асацыяцыі журналістаў, зараз за кратамі паводле палітычных матываў знаходзяцца 33 прадстаўнікі сродкаў масавай інфармацыі.