Хронікі рэпрэсій, 2 снежня. Жыхара Краснаполля асудзілі на год калоніі за крытыку Лукашэнкі пры сілавіках

За «здраду дзяржаве» будуць судзіць супрацоўніка новастворанага Дэпартамента крымінальнай выведкі. Распавядаем галоўнае, што стала вядома пра беларускіх палітвязняў сёння. 

Паводле інфармацыі праваабаронцаў ПЦ «Вясна».

Украінца Вячаслава Бародзія і Мікалая Ласоўскага асудзілі да 10 гадоў калоніі, Валянціну Полаз — да 9 гадоў калоніі

У Гомельскім абласным судзе вынеслі прысуд грамадзяніну Украіны Вячаславу Бародзію, а таксама беларусам Мікалаю Ласоўскаму і Валянціне Полаз. Суддзя Яўген Шаршнёў прызнаў усіх фігурантаў справы вінаватымі і прызначыў Бародзію і Ласоўскаму па 10 гадоў пазбаўлення волі ва ўмовах узмоцненага рэжыму, па Полаз — 9 гадоў калоніі, паведаміла БелТА. Таксама кожнаму фігуранту прызначылі штраф памерам 550 базавых велічыняў.

Падрабязнасці пераследу ўкраінскага егера сталі вядома з прапагандысцкага фільма год таму, у якім Вячаслава на следчых дзеяннях вадзілі на ланцугу. Агулам трох чалавек абвінавацілі адразу паводле шасці артыкулаў Крымінальнага кодэкса, у тым ліку «здрада дзяржаве» і «агентурная дзейнасць».

Суд ў закрытым рэжыме праходзіў з 15 кастрычніка. Усе фігуранты справы знаходзяцца пад вартай.

Вядомага трэнера па ўсходніх адзінаборствах сёння пачынаюць судзіць за жаданне ваяваць за Украіну

Міхаілу Галінскаму 59 гадоў. Ён адзін з самых вядомых трэнераў па кітайскіх адзінаборствах. Ягоныя выхаванцы выйгравалі міжнародныя спаборніцтвы па ўшу, а ягоная школа вядомая ў Беларусі і за яе межамі па выніках спаборніцтваў, піша «Наша Ніва».

Міхаіла затрымалі ў чэрвені. Спачатку яго судзілі па адміністратыўнай справе — за «непадпарадкаванне супрацоўнікам міліцыі». Суд па «крыміналцы» над Міхаілам пачаўся 2 снежня. Яго абвінавачваюць у «спробе ўдзелу ў вайне» (ч. 1 арт. 361-3 КК).

Судзіць Галінскага прызначана Вера Галаўкова.

Віцебскага актывіста Аляксея Саламаненку пачынаюць судзіць за данаты

2 снежня ў Віцебскім абласным судзе пачнецца разгляд справы ў дачыненні да Аляксея Саламаненкі. Яму інкрымінаваны арт. 361-2 КК (фінансаванне экстрэмісцкай дзейнасці). Справу прызначана разглядаць Галіна Бондал.

У 2020-ым годзе Аляксея некалькі разоў судзілі паводле адміністрацыйных спраў — адзін з судоў быў за ўдзел у стрыме Сяргея Ціханоўскага.

У Мінску судзяць жанчыну затрыманую за тэлеграм-чат «Здравый смысл на Алибегова»

У Мінскім гарадскім судзе адбываецца працэс над Марынай Мышко. Яе абвінавачваюць паводле трох артыкулаў Крымінальнага кодэкса: ч. 1 арт. 342 (актыўны ўдзел у дзеяннях, што груба парушаюць грамадскі парадак), ч. 1 арт. 130 (распальванне іншай сацыяльнай варожасці), ч. 1 арт. 367 (паклёп на Лукашэнку).

Справу разглядае Міхаіл Макарэвіч.

Меркавана, Марыну затрымалі ў лютым 2024 года падчас рэйда за тэлеграм-чат «Здравый смысл на Алибегова», калі прызналі яго «экстрэмісцкім фармаваннем». Агулам у рашэнні КДБ прапісана 19 удзельнікаў і ўдзельніц чата, сярод ярод якіх — Марына Мышко.

У Магілёве распачаўся чарговы завочны суд, але ў закрытым рэжыме

У Магілёўскім абласным судзе 2 снежня распачаўся суд над 42-гадовым Уладзімірам Раманенкам. Яму інкрымінаваныя ч. 1 арт. 130 КК (распальванне іншай сацыяльнай варожасці), ч. 1 арт. 368 КК (абраза Лукашэнкі), арт. 369 КК (абраза прадстаўніка ўлады).

Справу разглядае Ігар Зямцоў. Працэс праходзіць у закрытым рэжыме.

Крымінальную справу ў парадку спецвытворчасці супраць мужчыны ўзбудзілі ў чэрвені гэтага года.

Сілавікі прыйшлі з ператрусам да 85-гадовай бабулі былога журналіста «Белсата»

Пра чарговы ператрус у сваякоў Сяргей Скулавец паведаміў у Facebook. Сяргей зараз жыве ў ЗША. Летам 2023 года ён з’ехаў з Беларусі, асцерагаючыся пераследу за прафесійную дзейнасць. Сутнасць прэтэнзій і нагода ператрусу засталіся невядомымі. Але людзі, якія назваліся следчымі і супрацоўнікамі КДБ, цікавіліся менавіта асобай журналіста.

«Перагледзелі мабільнікі, задавалі нейкія пытанні, а потым самі на іх адказвалі і нешта запісвалі. Бацька ж сказаў, што ў гэтым доме няма аніякіх маіх рэчаў, але гэта іх зусім не цікавіла», — распавядае Сяргей.

Акрамя таго, паводле слоў журналіста, днямі яго родным пачалі званіць невядомыя асобы, якія прадстаўляліся супрацоўнікамі дэпартамента фінансавай бяспекі.

«Пытаюцца дзе я, маўляў, не могуць да мяне дазваніцца», — піша Скулавец. Ён адзначае, што не хавае свайго месцазнаходжання, вядзе сацыяльныя сеткі, дзе ёсць усе кантакты, паведамляе БАЖ.

За «здраду дзяржаве» будуць судзіць супрацоўніка новастворанага Дэпартамента крымінальнай выведкі

У Мінскім гарадскім судзе 19 снежня пачнуць разглядаць справу супраць 35-гадовага Аляксандра Кудрэвіча. Яго абвінавачваюць паводле ч. 3 арт. 361-1 КК (удзел у экстрэмісцкім фармаванні) і ч. 2 арт. 356 КК (здрада дзяржаве, здзейсненая службовай асобай, якая займае адказнае становішча, або асобай, на якую распаўсюджваецца статус вайскоўца). Справу будзе разглядаць Любоў Сімахіна. 

Верагодна, ён працаваў у Дэпартаменце крымінальнай выведкі, які падаў супраць Аляксандра пазоў за прычыненне маёмаснай шкоды.

Аляксандра затрымалі, верагодна, у студзені. Паводле інфармацыі ў ягоных сацсетках, мужчына жанаты, у 2014 годзе скончыў БДУІР.

Жыхара Краснаполля асудзілі на год калоніі за выказванне пра Лукашэнку

Жыхара Краснаполля Аляксандра Кірэева асудзілі да аднаго года пазбаўлення волі ў калоніі ва ўмовах агульнага рэжыму за крытыку Лукашэнкі пры сілавіках. Такі прысуд вынес суд Краснапольскага раёна 2 кастрычніка. Справу разглядала суддзя Яўгенія Краўцова.

Падставай для крымінальнай справы стала тое, што Кірэеў у чэрвені ў прысутнасці супрацоўнікаў Краснапольскага РАУС і аддзела прымусовага выканання Краснапольскага раёна, выказаў негатыўную ацэнку Лукашэнкі. Паводле версіі абвінавачання, пры гэтым ён выкарыстаў ненарматыўную лексіку. 

У Гродне судзяць індывідуальнага прадпрымальніка

Сёння ў Гродзенскім абласным судзе пачынаюць судзіць Андрэя Слізевіча — індывідуальнага прадпрымальніка. Паводле версіі абвінавачання, ён нібыта пакідаў негатыўныя каментары пра Расею пасля тэракту ў «Крокус Холе» і заклікаў бамбіць расейскія гарады.

Суддзя Віталь Кулеш разглядае справу ў дачыненні да мужчыны паводле трох артыкулаў: арт. 130 (распальванне сацыяльнай варожасці і варажнечы), ч. 1 і ч. 2 арт. 368 (абраза Лукашэнкі), арт. 367 (паклёп у дачыненні да Лукашэнкі) Крымінальнага кодэксу.

Андрэя затрымалі ў сакавіку. Праўладныя каналы публікавалі з ім «пакаяльнае» відэа.

Расіянку, якая ў 2021 годзе расхвальвала жыццё ў Беларусі, будуць судзіць у Гомелі за «распаўсюд экстрэмізму»

На 9 снежня ў судзе Гомельскага раёна запланаваны суд над жыхаркай пасёлка Яроміна Раісай Міхайлавай. Жанчыну абвінавачваюць паводле ч. 2 арт. 19.11 КаАП (распаўсюд экстрэмісцкіх матэрыялаў). Працэс будзе ўзначальваць суддзя Жанна Баль.

У 2021 годзе ў інтэрв’ю гомельскай раённай газеце жанчына расхвальвала лад жыцця ў Беларусі, піша «Гомельская Вясна».

«Мы з мужам не забываемся і пра нашых сяброў-расіян. Часта выходзім з імі на сувязь, расказваем пра тое, як выдатна жыць у Беларусі, колькі тут даецца магчымасцяў і сацыяльных гарантый».

Таксама яна радавалася таму, што Беларусь знаходзіцца ў саюзе з Расіяй, сцвярджала, што нібыта ў беларусаў і расійцаў агульная гісторыя і агульная будучыня. Прапагандысты ў тым артыкуле распавялі, што Раіса Міхайлава пераехала ў Беларусь паўтара дзясятка гадоў таму і ніводнага разу не пашкадавала пра свой крок.