IBA Group канчаткова пакінула беларускі і расійскі рынкі
IBA Group, найстарэйшая ІТ-кампанія з беларускімі каранямі, ужо не мае кліентаў на беларускім і расійскім рынку. Пра гэта заявіў заснавальнік і генеральны дырэктар IBA Сяргей Ляўцееў.
Ілюстрацыйная выява. Дата-цэнтр IBA ў Мінску
«У нас ёсць некаторыя страты з пункту гледжання людзей, з пункту гледжання бізнесу, але яны для нас не драматычныя», — рассказаў Сяргей Ляўцееў Emerging Europe.
Адна з вядучых кампаній у сферы ІТ-паслуг у Еўропе IBA Group у траўні адзначыла 30-годдзе. Першапачаткова кампанія была створана як сумеснае прадпрыемства IBM і мясцовых ІТ-арганізацый у Мінску, Беларусь, а затым у 2005 годзе пераехала ў Чэхію. Зараз IBA Group мае офісы ў 15 краінах і цэнтры распрацоўкі ў дзевяці. Міжнародная асацыяцыя прафесіяналаў аўтсорсінгу (IAOP) ужо даволі даўно ўваходзіць у рэйтынг Global Outsourcing 100.
Кампанія больш не разлічвае на свой цэнтр распрацоўкі ў Беларусі.
«Гэта таксама перавага, таму што мы з нашымі распрацоўшчыкамі бліжэй да нашых кліентаў. Раней у нас былі свае офісы продажаў, прадстаўніцтвы [якія былі за межамі Беларусі], цяпер гэта нашы распрацоўшчыкі, а ў нас больш распрацоўшчыкаў за межамі Беларусі, чым у Беларусі».
У цяперашні час каля 60 адсоткаў гэтых распрацоўшчыкаў знаходзяцца ў іншых месцах. Гэтаму спрыяла і палітычная сітуацыя ў Беларусі, многія людзі больш не адчувалі сябе там у бяспецы і з'ехалі. IBA Group аказала вялікую падтрымку сваім супрацоўнікам і дапамагла ім пераехаць.
«Калі казаць пра тэхналогіі, то ўсе гэтыя людзі працуюць з адной і той жа тэхналогіяй. Людзі з Беларусі, Украіны; яны прывозяць свой досвед у Польшчу, напрыклад, як у нашым выпадку, і працягваюць працаваць у той жа сферы. Вядома, канкурэнцыя расце, але многія з гэтых кампаній працуюць на міжнародных кліентаў. Гэта можа змяніцца ў будучыні, але на дадзены момант мясцовыя рынкі не моцна закрануты».
Глядзіце таксама
Будучыня, на думку Ляўцеева, таксама будзе залежаць ад таго, як будзе развівацца сацыяльная, эканамічная і, галоўнае, палітычная сітуацыя найбліжэйшым часам.
Нядаўнія ўнутраныя і знешнія палітычныя падзеі, у тым ліку сфальсіфікаваныя прэзідэнцкія выбары ў жніўні 2020 года і ўварванне Расіі ва Украіну ў 2022 годзе, змянілі ўмовы і імідж беларускага ІТ-сектара.
Некаторыя найбуйнейшыя ІТ-кампаніі закрылі свой бізнес у Беларусі, такія як Wargaming, PandaDoc, Flo, Wannaby, OneSoil, WorkFusion, EIS Group, Vochi, Playrix.
Па даных German Economic Team, у перыяд з сакавіка па снежань 2022 года малыя, сярэднія і буйныя ІТ-кампаніі страцілі 17 200 супрацоўнікаў, што складае каля 20% ад агульнай колькасці супрацоўнікаў у ІТ-галіне. У 2022 годзе сектар упершыню скараціўся на 2,2% (у параўнанні з ростам на 9,2% у 2021 годзе).
“Яшчэ ёсць шанц, што ў Беларусі будзе менш стасункаў з Расеяй і больш стасункаў з суседзямі з Захаду, [і сітуацыя палепшыцца]. Сёння вельмі важна, што адбудзецца ва Украіне, асабліва для Беларусі. Мы вельмі спадзяемся, што Беларусь не будзе ў складзе Расеі. Некаторыя крокі ўжо зроблены. Паміж Расеяй і Беларуссю ўжо ёсць мяжа – мяжы не было амаль 20 гадоў. І ёсць пашпартны кантроль”, — кажа Ляўцееў.
Гэта дае надзею беларускаму ІТ-сектару і кампаніям з беларускімі каранямі на тое, што неўзабаве ён зноў будзе мець больш шырокую прысутнасць у краіне.