«Кіберпартызаны» мяняюць інфармацыю на 50 палітвязняў
«Кіберпартызаны» заявілі, што ўзламалі БДУ. Вярнуць даныя гатовы за выпуск 50 палітвязняў, піша «Люстэрка».
«Кіберпартызаны» паведамілі, што пачалі працу над атакай на Белдзяржуніверсітэт пасля выхаду пакаяннага відэа са студэнтам, якое знялі ў ВНУ. Спатрэбіўся час, каб укараніцца ў сетку і надзейна там замацавацца. Цяпер ад наступстваў кібератакі «БДУ не адновіцца яшчэ доўга», заявілі «Кіберпартызаны».
Паводле «Кіберпартызан», у выніку атакі пашкоджаны дамен-кантралёры, зашыфраваны працоўныя станцыі, выпампавана больш за 3 тэрабайты даных, выдалены базы супрацоўнікаў, студэнтаў, абітурыентаў. А таксама зачышчана ўся бухгалтэрыя, воблачныя сэрвісы, пошты, файлаабменнікі, знішчаны бэкапы.
У выніку ўсе сайты bsu.by недаступныя. «Кіберпартызаны» апублікавалі скрыншоты сайта і запампаваных даных, а таксама ўзор характарыстыкі выкладчыка, дзе пазначана: «антыдзяржаўных праяў на працоўным месцы... не было».
«Кіберпартызаны» распавялі, што першапачаткова атрымалі лагін-пароль аднаго са студэнтаў, які «займае адказныя пасады ў БРСМ і мае доступ да некаторых сістэм». Таму ім удалося зайсці праз яго акаўнт на сайт БДУ. Мяркуючы па скрыншотах, студэнта завуць Уладзімір Бараноўскі. Ён актыўны ў сацсетках і вядзе блог у TikTok.
«Затым мы атрымалі доступ да пошты і воблачнага сэрвісу БДУ, а таксама да іх сайтаў. А пасля праніклі на серверы і ва ўнутраную сетку», — падзяліліся «Кіберпартызаны». Да атакі прыступілі ў ноч з 3 на 4 ліпеня.
Глядзіце таксама
«Установа адукацыі, якая зганьбілася дзеяннямі ў стылі карных органаў, атрымлівае па заслугах, — гаворыцца ў паведамленні «Кіберпартызан». — Наша пасланне для ўсіх арганізацый і структур Беларусі: дзейнічаеце як карнікі — атрымліваеце як карнікі. Тады вы становіцеся для нас цэллю як памагатыя дыктатуры і гвалту».
«У абмен на вызваленне 50 палітвязняў мы гатовы адправіць адмінам БДУ 3 тэрабайты звестак, якія ў іх выпампавалі», — заявілі «Кіберпартызаны».
Нагадаем, як пісаў «НЧ», напрыканцы 2022 года Беларускі полк імя Кастуся Каліноўскага (ПКК), які ваюе на баку Украіны, і група хакераў-актывістаў «Кіберпартызаны» заявілі, што аб'ядноўваюць свае намаганні ў змаганні з дыктатурай.