Лагер ПВК «Вагнер» пад Асіповічамі дэмантуюць: Што гэта азначае?
Спадарожнікавыя здымкі сэрвісу Planet Labs — першае рэальнае пацверджанне, што частка наймітаў «Вагнера» сапраўды магла пакінуць Беларусь у першай палове жніўня.
На эксклюзіўным спадарожнікавым здымку сэрвісу Planet Labs, які атрымала Свабода, можна заўважыць актыўную фазу дэмантажу лагеру вагнераўцаў у вёсцы Цэль, што пад Асіповічамі. Паводле падлікаў журналістаў, прыбралі ўжо траціну ад усіх намётаў.
«Свабода» апублікавала спадарожнікавы здымак лагера ПВК «Вагнер» у вёсцы Цэль, зроблены сэрвісам Planet Labs 23 жніўня, і параўнала яго з больш раннімі здымкамі.
Даныя журналістаў пацвярджаюць інфармацыю наконт змяншэння колькасці намётаў у палявым лагеры. Калі на 15 жніўня была дэмантаваная толькі 1/10 частка, то на 23 жніўня сітуацыя карэнным чынам змянілася, піша Антон Матолька.
Паводле падлікаў Радыё Свабода, на 23 жніўня з 273 намётаў было разабрана ўжо 101, або частка палявога лагера. Гэта значыць, што лагер мог зменшыцца на амаль 2 000 чалавек (па 20 чалавек на палатку, але частка была для гаспадарчых патрэб). Паведамляецца, што разбор намётаў пачаўся, меркавана, 1 жніўня, але, адзначае Матолька са спасылкай на ўласную інфармацыю, дэмантаваць палаткі пачалі яшчэ да 28 ліпеня.
Як мяняўся лагер ПВК «Вагнер» з 23 ліпеня па 15 жніўня:
- 23 — 25 ліпеня: Працягваўся звыклы рух тэхнікі. Частка з’язджала, частка з’яўлялася, але агульная колькасць была бязь зменаў.
- 25 — 27 ліпеня: Тэхнікі стала крыху менш. У гэты перыяд пачаўся разбор намётаў — было разабрана не менш за 10 штук.
- 27 ліпеня — 1 жніўня: На тэрыторыі лагера адбылося нязначнае павелічэнне колькасці будаўнічай тэхнікі.
- 1 — 9 жніўня: У лагер працягвала прыбываць будаўнічая тэхніка. У паўднёвай частцы лагера з'явілася новая буйная паркоўка пад яе. Было разабрана яшчэ каля 17 намётаў.
- 9-15 жніўня: Разбор намётаў працягваўся, разабралі яшчэ каля 8 адзінак.
Фактычна, апошнія спадарожнікавыя здымкі — гэта першае рэальнае пацверджанне, што частка наймітаў сапраўды магла пакінуць Беларусь у першай палове жніўня. Верагодна, гэты працэс працягваецца і цяпер.
Пра што можа сведчыць дэмантаж часткі лагера пад Асіповічамі?
У святле апошніх падзей (верагодная смерць Прыгожына) лёс наймітаў і іх лагера ў Беларусі з'яўляецца нявызначаным.
Матолька адзначае, што і яго даныя, і інфармацыя выдання «Радыё Свабода» паказваюць, што, нягледзячы разбор часткі намётаў, колькасьць тэхнікі ў лагеры ў вёсцы Цэль практычна не змянілася. Іншымі словамі, калі частка наймітаў сапраўды і з’язджалі ў Расію, то ў цэлым ПВК «Вагнер» цалкам закрываць свой палявы лагер пакуль не збіраліся.
Гэтую гіпотэзу пацвярджае і рэгістрацыя двух юрыдычных асоб, звязаных з Яўгенам Прыгожыным. Апошняя з іх была зарэгістравана толькі 4 жніўня.
Матолька нагадвае, што пакуль па-ранейшаму не былі зафіксаваныя і спецыяльныя вывазныя рэйсы з наймітамі ПВК «Вагнер» з Беларусі ў Афрыку, няма інфармацыі і аб перакідванні наймітаў з самалётамі з тэрыторыі Расі.
Але ёсць яшчэ адзін важны момант — гэта відавочнае памяншэнне навін беларускай прапаганды аб перадачы наймітамі ПВК «Вагнер» унікальнага баявога вопыту Узброеным сілам РБ. Сам падыход да асвятлення гэтай тэмы ў прапагандысцкіх СМІ можна ахарактарызаваць як хвалепадобны.
Пасля прыбыцця наймітаў у Беларусь і правядзення першых заняткаў прапаганда публікавала шмат паведамленняў па гэтай тэме. Аднак цяпер гэтая тэма фактычна сышла на нішто. Напрыклад, апошняя згадка Мінабароны РБ аб трэніроўках ПВК «Вагнер» і войска РБ датуецца 30 ліпеня.
Пры гэтым, ёсць інфармацыя, што сумесныя трэніроўкі ўсё яшчэ працягваюцца.
Такім чынам, можна канстатаваць, што ў бліжэйшы час дзейнасць наймітаў ПВК «Вагнер» у Беларусі можа быць істотна рэарганізавана. Прама цяпер можна выказаць здагадку наступныя варыянты:
Глядзіце таксама
Поўнае згортванне дзейнасці наймітаў (ліквідацыя палявога лагера ў вёсцы Цэль, ліквідацыя юрыдычных асоб, вывад наймітаў і тэхнікі);
Працяг працы інфраструктуры ПВК «Вагнер» пад новым кіраўніцтвам (тут пытанне, пад чыім і ў якім выглядзе);
Перадача структуры ПВК «Вагнер» пад кіраванне рэжыму Лукашэнкі (тэарэтычна, гэта магчыма, але складана рэалізуецца, бо рэсурсаў для ўтрымання наймітаў можа проста не быць).