MILEX-2023: Якой зброяй выхваляецца Беларусь?

У Мінску завяршылася Міжнародная выстава ўзбраення і ваеннай тэхнікі MILEX-2023. Лукашэнка заявіў, што беларуская экспазіцыя стане прыкладам «найбольш перадавых» распрацовак абароннага сектара. Што цікавага прэзентуе беларускі ВПК?

Беспілотнікі як прыярытэт

Стварэнню беларускіх беспілотнікаў Лукашэнка апошнім часам надаваў асаблівую ўвагу. Летась ён інспектаваў новыя распрацоўкі на палігоне «Абуз-Лясноўскі», і тады назваў Беларусь сусветным лідарам у вытворчасці беспілотнікаў (незразумела на якой падставе), але разам з тым папярэджваў супрацоўнікаў ВПК, каб яны не займаліся «паказухай», пішуць «Белнавіны».

На выставе MILEX-2023 былі прадстаўлены адразу некалькі новых беларускіх беспілотнікаў. Найбольш перспектыўнымі з іх лічацца дроны «Чакан» і «Лоўчы», вытворчасці «558 авіяцыйнага рамонтнага завода». Дроны разлічаны на паражэнне жывой сілы і тэхнікі ў светлы час сутак у візуальных метэаўмовах. Абодва дроны былі створаны на базе больш старых, разведвальных апаратаў «Грыф-100» і «Бекард-2».

Цяпер няма звестак пра тое, што «Чакана» і «Лоўчага» запусцілі ў серыйную вытворчасць і пачалі пастаўляць у войска.

«Кветка», «Усход» і «Небасхіл»

Дзяржваенпрам таксама актыўна рэкламуе беларускія навінкі ў сферы радыёэлектроннай барацьбы і радыёлакацыі — комплексы «Кветка», «Усход» і «Небасхіл». Усе тры распрацоўкі належаць КБ «Радар».

Станцыя перашкод Р-327 «Кветка» прызначана для выяўлення, пеленгавання, месцавызначэння і радыёпрымача наземных і авіяцыйных ліній радыёсувязі кароткахвалёвага дыяпазону. «Кветка» дазваляе душыць сістэмы спадарожнікавай навігацыі GPS, ГЛОНАСС, BeiDou, Galileo. На цяперашняй выставе «Кветка» была ўпершыню паказаная шырокай публіцы, хоць, як сцвярджаюць улады, у войска пастаўлена ўжо «досыць вялікая колькасць» такіх станцый.

Першыя комплексы былі перададзеныя вайскоўцам у снежні 2022 года.

Таксама з канца 2022 года на ўзбраенне беларускай арміі пачаў паступаць трохкаардынатны радыёлакацыйны комплекс «Усход». Ён разлічаны на аўтаматычнае выяўленне паветраных аб'ектаў на далёкасці ад 10 да 360 км і вышыні 100 км.

А вось мабільная радыёлакацыйная станцыя выяўлення і цэлеўказання «Небасхіл» у войска яшчэ не паступіла. У Мінабароны кажуць, што цяпер «ідзе яго поўны выраб — яшчэ дадасца пост кіравання». Але ў перспектыве «Небасхілам» плануецца замяніць старыя радыёлакацыйныя станцыі. Станцыя прызначана для выяўлення паветраных аб'ектаў на адлегласці да 470 км і перадачы інфармацыі пра іх у камандныя пункты. Мяркуецца, што адначасова можна адсочваць не менш за 250 аб'ектаў.

Небяспечныя цацкі для дарослых

Знішчальнік дронаў і першы беларускі БТР

Упершыню на выставе прэзентавалі баявы модуль для барацьбы з дронамі «Крэчат» на базе БРДМ «Кайман» (распрацоўка 2566 завода па рамонце радыёэлектроннага ўзбраення). Фактычна на «Кайман» проста ўсталявалі радыёлакацыйную станцыю і два кулямёты. У склад модуля ўваходзіць таксама дрон-перахопнік.

Інфармацыі пра «Крэчат» зусім мала: у кантэксце цяперашняй выставы пра яго наогул упершыню распавялі публічна.

Значна больш звестак ёсць пра бронетранспарцёр МЗКЦ-690003 Volat-2, які ўпершыню быў прэзентаваны на MILEX-2021 і выклікаў тады павышаную цікавасць у прэсы — усё ж гэта першы беларускі БТР.

«Сапфір», якім хваляцца ўжо тры гады

Сярод лёгкай зброі найбольшую ўвагу прыцягнуў беларускі гранатамёт «Сапфір» калібра 61 мм. Сцвярджаецца, што ён здольны паражаць мэты на далёкасці да 1000 м, а прыцэльна біць на 500 м. Мінабароны рэкламуе гэты гранатамёт як супрацьтанкавы, але, мяркуючы па тэхнічных характарыстыках, ён разлічаны ўсё ж на барацьбу з жывой сілай і лёгкай бронетэхнікай. Асаблівасць гранатамёта ў тым, што некалькі адзінак можна аб'ядноўваць у кластар (да чатырох штук) і весці агонь залпам за кошт электроннага кіравання.

Праца над «Сапфірам» яшчэ не скончаная, заяўляецца, што зброя знаходзіцца на стадыі выпрабаванняў. Да канца года вытворцы плануюць выйсці на завяршэнне распрацоўкі вопытнага ўзору, пасля чаго пачнуць планаваць праграму серыйнай вытворчасці.

Цікава, што «Сапфір» прэзентуецца як абсалютная навінка, хаця такой не з’яўляецца.