«Ніхто не кажа аб масавым абмежаванні». У МУС пракаментавалі законапраект аб выездзе за мяжу

Урад падрыхтаваў праект закона, які прадугледжвае абмежаванні на выезд для пэўных груп грамадзян. Начальнік Дэпартамента грамадзянства і міграцыі МУС Беларусі Аляксей Бягун у эфіры тэлеканала «Беларусь 1» запэўніў, што ніхто не кажа аб масавым абмежаванні нейкіх правоў беларусаў за выезд за мяжу.

«Уводзяцца дадатковыя падставы і абмежаванні права грамадзяніна Рэспублікі Беларусь на выезд за мяжу — гэта ў інтарэсах нацыянальнай бяспекі. Але гэта часовыя абмежаванні. І яны будуць дзейнічаць на працягу шасці месяцаў. Права грамадзяніна можа быць абмежавана, калі ён прыцягнуты да адміністрацыйнага парушэння ў галіне парадку кіравання. І для таго, каб забяспечыць спагнанне штрафу», — цытуе Бягуна найбуйнейшы беларускі партал, прызнаны «экстрэмісцкім».

Па яго словах, ніхто не кажа аб масавым абмежаванне якіх-небудзь правоў беларусаў за выезд за мяжу.

«Гэта дакладныя карэкціроўкі закона, якія накіраваныя на ўдасканаленне праваадносін, у тым ліку ў галіне афармлення дакументаў і выезду за мяжу», — дадаў ён.

Нагадаем, напярэдадні быў апублікаваны агляд законапраекта, падрыхтаванага ўрадам. Яго галоўныя наваўвядзенні:

КДБ зможа абмежаваць выезд не толькі для тых, хто знаходзіцца на прафілактычным уліку ў органах дзяржаўнай бяспекі, але і тым, чый «выезд супярэчыць інтарэсам нацыянальнай бяспекі Рэспублікі Беларусь». Ён можа ўводзіцца на тэрмін да паўгода. Якія грамадзяне і на якіх падставах будуць трапляць у гэтую катэгорыю, не паведамляецца.

Выезд таксама забароняць тым асобам, «у дачыненні да якіх вядзецца адміністрацыйны працэс за ўчыненне адміністрацыйных правапарушэнняў супраць парадку кіравання — у мэтах забеспячэння выканання пастановы суддзі аб накладанні адміністрацыйнага спагнання ў выглядзе штрафу». У «правапарушэнні супраць парадку кіравання» ўваходзяць «палітычныя» артыкулы КаАП: непадпарадкаванне законнаму распараджэнню ці патрабаванню службовай асобы пры выкананні ім службовых паўнамоцтваў, парушэнне парадку арганізацыі або правядзення масавых мерапрыемстваў і гэтак далей.

Вайскоўцам, супрацоўнікам, работнікам і асобам грамадзянскага персаналу воінскіх фарміраванняў і ваенізаваных арганізацый Беларусі можна будзе выехаць за межы Беларусі толькі па ўзгадненні з кіраўніцтвам. Акрамя таго, у выпадку наяўнасці ў гэтай катэгорыі асоб біяметрычнага пашпарта, на час службы яны абавязаны перадаць яго ў кадравую службу сваёй арганізацыі.

Хочаце ведаць больш? Сачыце за нашымі публікацыямі ў Telegram і Facebook!

  • Апошняе на сайце
,
Больш цікавага на «Новым Часе»: