Паліна Шарэнда-Панасюк — ужо ў Вільні з сям’ёй. Хронікі рэпрэсій 6 лютага

На аднаго выпушчанага палітвязня прыходзіцца як мінімум два новых затрыманні. З дапамогай праваабаронцаў і незалежных СМІ сабралі асноўную інфармацыю пра палітычны пераслед у Беларусі на сёння, 6 лютага.

Паліна Шарэнда-Панасюк пакінула Беларусь, паведаміў сузаснавальнік Фонду BYSOL Андрэй Стрыжак: «Беларуская актывістка знаходзіцца ў бяспецы». Родныя і сябры, а таксама неабыякавыя беларусы сустрэлі яе на вакзале ў Вільні.

Нагадаем, што Паліна Шарэнда-Панасюк выйшла на волю 1 лютага пасля заканчэння чацвёртага тэрміну. Палітзняволеная правяла за кратамі 4 гады і 1 месяц. Яна была затрыманая 3 студзеня 2021 года і з таго часу знаходзілася ў зняволенні. На волі жанчыну чакалі двое сыноў. У калоніі сур'ёзна пагоршыўся стан яе здароўя.

* * *

У Кастрычніцкім раённым судзе Віцебска за «распаўсюд экстрэмізму» судзяць Ёэля Юроўскага. Паведамляецца, што хлопец скончыў сярэднюю школу №196 Мінска. Падчас вучобы ён быў пераможцам прадметных алімпіяд, і ў якасці ўзнагароды яго адправілі ў летні лагер «Зубраня». Пазней Ёэль паступіў на факультэт гуманітарных навук і моўных камунікацый Віцебскага дзяржаўнага ўніверсітэта. У мінулым навучальным годзе ён атрымаў падзяку ад адміністрацыі ўніверсітэта за валанцёрскую працу ў мясцовым музеі.

Справу ў дачыненні да маладога чалавека разглядае Алена Кот. Гэтая ж суддзя сёння разглядае справу Уладзіслава Ліпорта, якога таксама судзяць паводле ч.2 арт. 19.11 КаАП.

* * *

Як стала вядома «Гомельскай Вясне», разам з братам палітычнага эмігранта Мікалая Стагурскага затрымалі і іх бацьку, Васіля Стагурскага. У чым менавіта абвінавачваюць Васіля і Дзмітрыя Стагурскіх, невядома. Судовыя пасяджэнні па іх адміністрацыйных справах аб распаўсюдзе «экстрэмісцкіх матэрыялаў» прайшлі 5 лютага ў судзе Гомельскага раёна. Па словах палітычнага эмігранта Мікалая Стагурскага, яго брата Дзмітрыя затрымалі за падпіскі на «экстрэмісцкія каналы». Пра гэта стала вядома 4 лютага.

25 студзеня прапагандыст Азаронак апублікаваў у сваім тэлеграм-канале пост супольнасці «іх чакае суд» з пагрозай на адрас Мікалая Стагурскага. У пасце з пагрозай выкарысталі яго здымак з акцыі ў Ізраілі, якая была прысвечаная выбарам у Беларусі.

* * *

Гамяльчаніна судзяць па справе аб «дзяржаўнай здрадзе». Справа 35-гадовага жыхара Гомеля Юрыя Залатухіна разглядаецца ў закрытым пасяджэнні ў Гомельскім абласным судзе 6 лютага. Мужчыну выстаўленае абвінавачванне паводле арт. 356 КК (дзяржаўная здрада), паведамляюць праваабаронцы Вясны. Пакуль невядома, у чым менавіта ён абвінавачваецца. Мяркуючы па сацсетках, жонка Юрыя — украінка Ірына. Вядома, што мужчына некаторы час працаваў на будоўлі, аднак інфармацыі пра апошні месяц яго працы няма. Судовы працэс правядзе Дзмітрый Казлоў.

* * *

Алену Марозаву разам з сынам затрымалі ў сакавіку 2024 года па падазрэнні ва ўдзеле ў пратэстах. Спачатку яе пасадзілі на суткі, а затым змясцілі ў СІЗА. Марозаву абвінавачвалі паводле трох артыкулаў — «заклікі да нанясення шкоды Беларусі» (ч.3 арт. 361 КК), «распальванне варожасці» (ч.1 арт. 130 КК) і «ўдзел у дзеяннях, якія груба парушаюць грамадскі парадак» (ч.1 арт. 342 КК). Хутчэй за ўсё, справа ў неабароненым тэлеграм-акаўнце, прывязаным да яе нумара, і, магчыма, нейкіх допісах у «Аднакласніках». Жанчыну судзілі з 10 снежня 2024 года ў Мінскім гарадскім судзе. Ёй пагражала да 12 гадоў зняволення. Рашэнне суда невядома.

Алене Марозавай 45 гадоў. Мяркуючы па сацсетках, яна скончыла Беларускі дзяржаўны эканамічны ўніверсітэт. Працавала ў кампаніі «Смартон», якая спецыялізуецца на аптовых продажах канцтавараў.

* * *

У палітзняволенага Сяргея Ярашэвіча нядаўна памёр бацька. Сам Сяргей у калоніі знаходзіцца ў ШІЗА.

Сяргей — адзін з адміністратараў тэлеграм-каналу «Армія з народам», а таксама муж даверанай асобы Святланы Ціханоўскай і былой палітзняволенай Антаніны Канавалавай. Ён вярнуўся ў Беларусь пасля затрымання жонкі, перад гэтым выехаў, бо адчуваў небяспеку. Пазней яго асудзілі да 6 гадоў і 3 месяцаў пазбаўлення волі ў калоніі ва ўмовах узмоцненага рэжыму.