Палітвязня Мікіту Слепянка пакаралі трыма гадамі калоніі за адміністраванне гістарычнага ТГ-канала Rezystans

Гомельскі абласны суд 6 верасня вынес прысуд па крымінальнай справе адміністратара культурна-гістарычнага Telegram-канала Rezystans палітзняволенага Мікіты Слепянка. Юнака абвінавацілі ў стварэнні экстрэмісцкага фарміравання і кіраванні ім (ч. 1 арт. 361-1 Крымінальнага кодэкса). Судовы працэс вёў суддзя Васіль Бягун, паведамляюць праваабаронцы.

Мікіта Слепянок стварыў і адміністраваў культурна-гістарычны Telegram-канал Rezystans. Працаваў электрыкам у Гомелі, маляваў, намагаўся пісаць музыку, вучыўся граць на гітары. Быў выкліканы на допыт у міліцыю 6 красавіка 2022 года, пасля чаго Мікіту затрымалі. Пазней стала вядома, што на яго заведзена крымінальная справа. Rezystans, у якога больш за 200 падпісчыкаў, МУС прызнаў «экстрэмісцкім фарміраваннем».

Да суда Мікіта Слепянок утрымліваўся ў СІЗА-3 горада Гомеля.

Паводле матэрыялаў абвінавачання, «летам 2021-га Слепянок стварыў тэлеграм-канал, які вясной гэтага года прызналі экстрэмісцкім. Сам адміністраваў яго і пісаў тэксты. На судзе запэўніваў, што за рэсурс грошай не атрымліваў. Першапачаткова размяшчаў матэрыялы культурна-гістарычнага характару, хоць назваў канал Resistance, што перакладаецца як супраціў. Потым пераключыўся на публікацыі, у якіх дыскрэдытаваў і абражаў органы ўлады і кіраўніка дзяржавы, перадрукоўваў экстрэмісцкія пасты, размяшчаў нацысцкую сімволіку. Акрамя таго, выстаўляў у негатыўным святле расейцаў. У адным з паведамленняў напісаў, што калі ў хату прыйдзе маскаль, яе трэба спаліць. Пратэсныя думкі выказваў эмацыйна, не саромеўся ў выразах».

«Ён перакананы, што яго ўсе кінулі і адракліся ад яго»

Бок абвінавачання 2 верасня запрасіў для Слепянка пазбаўленне волі тэрмінам на тры гады ў калоніі агульнага рэжыму.

Суддзя пацікавіўся ў абвінавачанага, што яго не задавальняла ў нашай краіне? Слепянок адказаў, маўляў, яму цяжка быць беларусам, нібыта яго не разумеюць навакольныя, варожа ставяцца з-за таго, што ён размаўляе на роднай мове.

Сёння суд прызнаў Мікіту вінаватым і пакараў трыма гадамі пазбаўлення волі ў калоніі ўзмоцненага рэжыму.