Палітзняволенаму сябру БСДП Ігару Ледніку прысудзілі тры гады калоніі за артыкул у часопісе

У судзе Ленінскага раёна Мінска 6 верасня вынесены прысуд па крымінальнай справе палітзняволенага сябра БСДП з Барысава Ігара Ледніка. Ветэрана партыйнага руху абвінавацілі ў паклёпе на прэзідэнта (ч.2 арт. 367 Крымінальнага кодэкса).

Справу разглядала суддзя Таццяна Шоцік.

Ігар Леднік быў затрыманы 18 красавіка 2022 года. Напачатку яму прысудзілі 15 сутак адміністрацыйнага арышту, але пасля іх ён на волю не выйшаў – быў змешчаны ў Следчую турму №8 у Жодзіне.

Згодна з матэрыяламі справы, Ігар Леднік з чэрвеня па снежань 2020 года прадаставіў для публікацыі ў адзін з часопісаў артыкул з загалоўкам «Міжнародна прызнаны нейтралітэт Беларусі — гарантыя бяспекі ў рэгіёне АБСЕ».

Названы матэрыял апублікаваны ў друкаваным выданні «Пазіцыя» 28 снежня 2020 года, а 7 чэрвеня 2021 года размешчаны на яго сайце. У ім нібыта ўтрымліваліся загадзя ілжывыя звесткі, якія ганьбяць і зневажаюць гонар ды годнасць Лукашэнкі, у сукупнасці  з абвінавачваннем у асабліва цяжкіх злачынствах, у тым ліку супраць бяспекі чалавецтва.

18 ліпеня 2022 года суд Барысаўскага раёна прызнаў інфармацыйную прадукцыю Facebook-старонкі Ігара Ледніка «экстрэмісцкімі матэрыяламі».

Абвінавачанне ў ходзе судовага працэсу запрасіла для Ігара Ледніка пазбаўленне волі тэрмінам на тры гады ў калоніі агульнага рэжыму.

Як стала вядома праваабаронцам, менавіта такі тэрмін і прысудзіў Ледніку суд. Акрамя таго, канфіскацыі падлягаюць камп'ютар і тэлефон Ігара. Канфіскаваныя падчас вобшуку ў яго кватэры асобнікі часопіса «Пазіцыя» падлягаюць знішчэнню.