Расія збіраецца экстрадаваць яшчэ аднаго пратэстоўца-беларуса — насуперак забароне ЕСПЧ

Актывіста Андрэя Казімірава абвінавачваюць ва ўдзеле ў масавых беспарадках 9 жніўня 2020 года, звязаных з прэзідэнцкімі выбарамі ў Беларусі, яму пагражае 8 гадоў пазбаўлення волі. Падчас аднаго з мітынгаў актывіст быў паранены ў нагу гумовай куляй.

Маскоўскай Хельсінкскай групе распавялі «Открытые медиа», што расійскі суд дазволіў выдаць Беларусі фігуранта справы аб масавых беспарадках у жніўні 2020 года Андрэя Казімірава, нягледзячы на забарону ЕСПЧ.

Беларускі грамадзянін Андрэй Казіміраў на радзіме абвінавачваецца ва ўдзеле ў масавых беспарадках 9 жніўня 2020 года, звязаных з прэзідэнцкімі выбарамі ў краіне, яму пагражае 8 гадоў пазбаўлення волі.

Падчас аднаго з мітынгаў актывіст быў паранены ў нагу гумовай куляй. Калі яму стала вядома пра крымінальны пераслед, ён з'ехаў у Расію. Там яго затрымалі 14 студзеня 2021 года.

29 красавіка 2021 года Генеральная пракуратура Расійскай Федэрацыі апавясціла Казімірава аб задавальненні запыту на экстрадыцыю.

Пра тое, што першы апеляцыйны суд вырашыў праігнараваць пастанову Еўрапейскага суда па правах чалавека, «Открытые медиа» паведаміў кіраўнік прававых праграм МХГ Раман Кісялёў.

Адвакат Казімірава Іларыён Васільеў распавёў, што першы апеляцыйны суд агульнай юрысдыкцыі пакінуў у сіле пастанову Масгарсуда, які, у сваю чаргу, прызнаў законнай пастанову Генпракуратуры аб экстрадыцыі беларуса, нягледзячы на пастанову ЕСПЧ ад 27 ліпеня аб забароне яго выдачы ў сувязі з правілам 39.

Правіла 39 — рашэнне ЕСПЧ аб экстраных часовых мерах, якія абавязковыя да выканання. Калі рашэнне не будзе выканана, то ўзнікае рызыка, што разглядаць справу не будзе сэнсу, таму што правы, якія парушаюцца, будзе немагчыма аднавіць. «Паколькі Расія ратыфікавала "Канвенцыю аб абароне правоў чалавека і асноўных свабод", то пастанова ЕСПЧ з'яўляецца часткай прававога поля РФ і абавязковая для дзяржаўных органаў, у тым ліку і для судоў», — заявіў Васільеў.

На яго думку, пастанова Генпракуратуры і рашэнне Масгарсуда павінны быць адмененыя. «Казіміраў не можа быць выдадзены да канчатковага рашэння ЕСПЧ. Будзем звяртацца з касацыйнай скаргай. Таксама будзем хадайнічаць аб вызваленні Казімірава», — падкрэсліў адвакат.

Васільеў таксама выказаў надзею, што Генпракуратура не парушыць рашэнне ЕСПЧ і не выканае сваю пастанову аб экстрадыцыі, якая ўступіла ў сілу 29 ліпеня, неадкладна. «Цяпер гэта асабліва важна — з улікам таго, што Генеральная пракуратура прыступіла да выканання абавязкаў прадстаўніка ў ЕСПЧ», — падкрэсліў адвакат.

Паводле openmedia.io