Сусветныя брэнды не спяшаюцца ў мінскія гандлёвыя цэнтры

У Мінску назіраецца лішак гандлёвых цэнтраў, але сусветныя брэнды абыходзяць іх бокам.



За апошнія пяць гадоў сталічны рынак гандлёвай нерухомасці штогод павялічваўся ў сярэднім на 10-15%. За 2014 год ён вырас на 16,8% (да 780 тыс. кв. м). За дзесяць месяцаў гэтага года - на 10,2% (да 915 тыс. кв. м), пішуць «Белорусские новости». «Галоўным трэндам апошняга года з'яўляецца істотны рост прапановы», — адзначае дырэктар дэпартамента даследаванняў і кансалтынгу кампаніі Colliers International Дзяніс Чацверыкоў.
Паводле колькасці квадратных метраў гандлёвай плошчы на тысячу жыхароў Мінск наблізіўся да Санкт-Пецярбургу і Варшавы, абагнаў Маскву і Кіеў, але не дацягвае да Рыгі і Вільнюса
Перавытворчасць гандлёвых плошчаў супала з пачаткам крызісных з'яў у эканоміцы. Сумесны эфект ад гэтага выліўся ў рэзкае падзенне вакантнасці ды ставак.
У параўнанні з дакрызісных перыядам сярэднярынкавае падзенне ставак склала 20-30%, а на асобных аб'ектах — да 90%. Сярэдняя вакантнасць на канец трэцяга квартала гэтага года перавышае 9%.
«У некаторых аб'ектах, якія толькі адкрыліся альбо састарваюцца, колькасць пустых плошчаў можа дасягаць 30%»,— кажа Дзяніс Чацверыкоў.
Акрамя гэтага дэвелаперы адзначаюць той факт, што сусветныя брэнды не спяшаюцца ў сталічныя гандлёвыя цэнтры. У такой няпростай сітуацыі намеснік старшыні Мінгарвыканкама Жанна Бірыч прапануе інвестарам ісці на рызыкі і зніжаць арэндную стаўку.
«Цяпер трэба рызыкаваць тым, каб зніжаць арэндную плату, і за кошт абарачальнасці ўпускаць сусветныя брэнды», — кажа Жана Бірыч.
Яна прапануе інвестарам нават папрацаваць на страту, каб сталічныя гандлёвыя цэнтры не пуставалі. «Мы ідзем на ўсё, каб прыцягнуць арандатараў. І міжнародныя кампаніі, якія прыходзяць на наш рынак упершыню, увогуле не плацяць арэндную плату. Яны плацяць адсотак з абароту. Мы ім яшчэ і рамонт робім», — адказвае кіраўнік СТАА «Галерэя Канцэпт» Уладзімір Хейфец, які займаецца будаўніцтвам гандлёвага цэнтра Galleria Minsk на праспекце Пераможцаў.
Паводле ягоных слоў, сусветныя брэнды не спяшаюцца ў Беларусь зусім не праз тое, што дэвелаперы не зніжаюць арэндную плату. «Калі раней у іх былі палітычныя рызыкі, то цяпер у іх з'явіліся эканамічныя рызыкі», — адзначае Уладзімір Хейфец.
Калі па колькасці квадратных метраў на тысячу жыхароў Мінск абганяе суседнія гарады, то па сумарнай чыстага сярэдняга заробку на адзін квадратны метр беларуская сталіца саступае суседзям. «Калі суаднесці пакупніцкі патэнцыял і ўзровень канчатковага спажывецкага попыту з колькасцю гандлёвых плошчаў, то Менск на фоне суседзяў глядзіцца непераканаўча. Калі будзе ўпэўнены попыт, то брэнд прыйдзе», — кажа Дзяніс Чацверыкоў.
Акрамя таго, сусветныя брэнды зацікаўленыя прыйсці ў якасныя гандлёвыя цэнтры, а іх доля на рынку невялікая. Паводле ацэнак Colliers International, яна складае 11,8%.
«З пункту гледжання перспектывы толькі найбольш якасныя праекты маюць шанцы на выжыванне. Гэта тыя праекты, якія ўжо цяпер звернуць увагу на сучасныя трэнды, якія фармуюцца, эвалюцыю попыту. У адваротным выпадку аб'ектам не толькі будзе складана канкураваць, але яны будуць неэфектыўна займаць істотныя гарадскія тэрыторыі, адкідаючы Мінск у параметрах якасці гарадскога асяроддзя ў мінулае», — адзначаюць у Colliers International.