Святлана Ціханоўская: Героі паўстання 1863 года — і сёння крыніца нашай сілы

Сёння, у гадавіну пачатку паўстання Кастуся Каліноўскага, Святлана Ціханоўская наведала могілкі Росы, дзе пахаваныя героі 1863 года, і выступіла з прамовай.

«Паўстанне 1863 года аб'ядноўвае Літву, Польшчу, Украіну і Беларусь. Нашыя народы адмовіліся жыць пад прыгнётам акупантаў і паўсталі за сваю зямлю і сваю годнасць», — цытуе Ціханоўскую яе прэс-служба.

Паводле яе слоў, апошнія падзеі ў Беларусі і Украіне паказваюць, што «мэты паўстанцаў трэба адстойваць безупынку», бо «імперыя зноў грукаецца ў наш дом, імкнецца нас знішчыць ці падпарадкаваць».

«Сіла, якую знайшлі ў сабе нашыя з вамі землякі, каб супрацьстаяць расійскай імперыі, нават коштам уласнага жыцця — гэта сіла, якую яны перадалі і нам праз паўтара стагоддзя. Гэтая сіла — у любові да сваёй зямлі, любові да свайго народа. Гэтая сіла — у свабодзе, гэтая сіла — у смеласці, якую кожны з нас здольны знайсці ў сабе, каб здзейсніць подзвіг. Героі паўстання 1863 года — і сёння крыніца нашай сілы. Крыніца нашага нацыянальнага гонару і годнасці. Яны дапамагаюць беларусам супрацьстаяць тыранічнаму рэжыму Лукашэнкі і імперскай агрэсіі Расіі», — сказала Ціханоўская.

Яна нагадала, што Каліноўскі, які кіраваў паўстаннем на тэрыторыі Беларусі, «ёміста сфармуляваў нацыянальную ідэю Беларусі: толькі тады, народзе, зажывеш шчасліва, калі над табой не будзе чужой улады».

«Бо нам, беларусам, не трэба чужога. Проста дайце нам быць гаспадарамі ў сваёй краіне. Мы хочам будаваць Беларусь свабоднай і незалежнай дзяржавай, і імя Кастуся Каліноўскага працягвае натхняць нас у гэтай справе. Каліноўцы-добраахвотнікі адстойваюць гонар Беларусі на палях баёў ва Украіне, студэнты-каліноўцы — за партамі ў польскіх універсітэтах. А нашых міжнародных сяброў мы збіраем штогод на Форум Каліноўскага тут у Вільні, у літоўскім Сеймасе», — падкрэсліла палітык.

«Ведаеце, у Мінску мы з сям'ёй жылі ў раёне вуліцы Каліноўскага і часта там гулялі. Тады мае дзеці былі яшчэ маленькія і не ведалі, чым знакаміты Каліноўскі. Але нядаўна я распавяла старэйшаму гэтую гісторыю — пра тое, як адзін маленькі, але вольны душой чалавек змог запаліць іскру народа, каб паўстаць супраць вялікага зла. Нават калі ён трапіў за краты — ён не здаўся і заставаўся вольным чалавекам. «Ён такі ж, як наш тата!» — сказаў мой сын», — дадала Ціханоўская.

На яе думку, «у кожнай беларускай сям'і ёсць свой Каліноўскі — той, хто дае вам сілы на барацьбу і не дае спыніцца, нават калі здаецца, што ўжо няма надзеі».

«Я не магу здрадзіць мары маіх дзяцей вярнуцца дадому і хутчэй абняць бацьку. Мы не можам здрадзіць тым марам, якія аб'ядноўваюць нас і нашых герояў. Не можам здрадзіць памяці пра іх. Не можам і не маем права не змагацца за свой дом. І нягледзячы на тое, што трагічная гісторыя паўтараецца, і сёння нашыя народы зноў вымушаныя супрацьстаяць вялізнай імперыі, — я ведаю, што мы пераможам. Ведаю, што ўсе мы вернемся дадому. І ведаю, што Беларусь у хуткім часе вернецца ў Еўрапейскую сям'ю, якой належыць гістарычна», — падсумавала Святлана Ціханоўская.

Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: