Святлана Ціханоўская заклікае міжнародных партнёраў запусціць праграму падтрымкі незалежных СМІ Беларусі

Ва ўмовах беспрэцэдэнтнага ціску на незалежныя СМІ сёння, у Сусветны дзень свабоды друку, Ціханоўская накіроўвае ліст з заклікам стварыць комплексную праграму для падтрымкі незалежнай прэсы Беларусі міжнародным партнёрам, паведамляе яе тэлеграм-канал.

У праграму, якую прапануе Ціханоўская, уваходзіць:
- юрыдычная дапамога журналістам, якія знаходзяцца ў Беларусі і сутыкаюцца з судовым пераследам або любымі відамі ціску;
- тэхнічная дапамога для ўжо існуючых СМІ, у тым ліку прамая фінансавая дапамога на абсталяванне, якое было пашкоджана і / або канфіскавана, інструменты абыходу цэнзуры і адпаведнае праграмнае забеспячэнне;
- дапамога медыя і журналістам, якія былі вымушаны бегчы з краіны, ратуючыся ад пераследу, але працягваюць пісаць пра падзеі ў Беларусі;
- падтрымка новых сродкаў масавай інфармацыі, такіх як тэлеграм-каналы і каналы на YouTube, у тым ліку незалежных рэгіянальных медыя;
- дапамога журналістам, якія займаюцца расследаваннямі.
Гэты ліст накіроўваецца міжнародным партнёрам:
- спецдакладчыку ААН па пытанні аб праве на свабоду перакананняў;
- прадстаўніку АБСЕ па пытаннях свабоды СМІ;
- камісару ЕС па пытаннях палітыкі суседства і пашырэння;
- генеральнаму дакладчыку ПАРЕ па пытаннях свабоды СМІ.
- у нацыянальныя парламенты краін Еўропы.
«Я заклікаю ААН, АБСЕ, ЕС, міжнародныя арганізацыі і нацыянальныя ўрады прыняць жорсткую пазіцыю ў дачыненні беспрэцэдэнтнай хвалі нападаў на незалежную журналістыку ў Беларусі. Нам трэба спыніць гвалт і беззаконне, уключаючы спробы цэнзуры СМІ. Сітуацыя ў Беларусі з'яўляецца крытычным тэстам для еўрапейскай дэмакратыі. Толькі разам мы можам дасягнуць прагрэсу і пераканацца, што правы журналістаў абаронены», — піша Ціханоўская.
Паводле звестак БАЖ, у 2020 годзе незалежныя журналісты затрымліваліся больш за 480 разоў. 97 журналістаў прайшлі праз адміністрацыйныя арышты, у 62 выпадках яны падвяргаліся фізічнаму гвалту. Проста цяпер за кратамі знаходзяцца 11 журналістаў.
Марына Золатава, галоўная рэдактарка ​​TUT.by, атрымала папярэджанне за кантэкстную рэкламу на сайце, на якую сам партал паўплываць не можа. За інтэрв'ю са Святланай Ціханоўскай галоўны рэдактар ​​баранавіцкай газеты «Intex-Press» Уладзімір Янукевіч атрымаў дзве адміністрацыйныя справы, а саму газету прыбралі з дзяржаўнай сеткі распаўсюднікаў. Напрыканцы сакавіка «Новы Час» таксама атрымаў папярэджанні ад Мінінфарма.
2 красавіка парламент прыняў пакет законаў, якія істотна абмяжоўваюць працу журналістаў.