Што будзе з адлічэннямі ў ФСАН, калі памерці да выхаду на пенсію або праз год пасля
Сярэднестатыстычны беларус атрымлівае пенсію каля аднаго года пасля выхаду на заслужаны «адпачынак». Што будзе з гэтымі грашыма ў выпадку смерці чалавека, высвятляля «Люстэрка».
Чаканая працягласць жыцця ў Беларусі павялічваецца, але пакуль мужчыны ў сярэднім жывуць нашмат менш, чым жанчыны.
Сістэма не прадугледжвае атрымання пенсіі ў спадчыну
У Беларусі дзейнічае салідарная пенсійная сістэма. Гэта значыць, што адлічэнні на пенсійнае страхаванне, якія наймальнікі плацяць за работнікаў у ФСАН (гэта 28% ад заробку) і робіць сам працаўнік (гэта 1%), не назапашваюцца на будучыню гэтаму працаўніку, а трацяцца на выплаты цяперашнім пенсіянерам. Вам таксама будуць браць грошы на пенсію са страхавых адлічэнняў тых, хто працуе. І так па коле.
У такой сістэме не прадугледжанае атрыманне пенсіі ў спадчыну. І ўсё роўна, у якім узросце памёр чалавек — за пару гадоў да выхаду на заслужаны «адпачынак» ці праз год.
Але ёсць нюанс: блізкія чалавека пасля яго смерці ўсё ж могуць разлічваць на невялікія выплаты (дарэчы, іх таксама называюць спадчыннымі). Гаворка ідзе пра сумы, якія ўжо налічылі, але не паспелі выдаць памерламу.
Разлічваць на такія выплаты можа сям’я памерлага. Гэта муж (жонка), дзеці, бацькі, дзед, бабка, унукі, родныя браты і сёстры, усынаўляльнік або ўсыноўлены. Належныя выплаты дзеляцца пароўну паміж усімі такімі сямейнікамі, якія жылі сумесна з пенсіянерам у дзень смерці, калі яны падалі адпаведную заяву. Таксама на выплаты могуць разлічваць утрыманцы (нават калі не жылі з ім).
Але марудзіць з атрыманнем гэтых грошай не варта. Звярнуцца па іх можна цягам шасці месяцаў з дня смерці пенсіянера. Калі чалавек жыў адзін і ў яго не было непрацаздольных утрыманцаў, яго спадчыннікам неабходна звярнуцца да натарыуса, які выдасць пасведчанне пра права на спадчыну на недаатрыманыя сумы пенсій. З гэтым сведчаннем спадчыннікі змогуць атрымаць належныя грошы.
Глядзіце таксама
«Другую» пенсію можа атрымаць спадчыннік
У нашай краіне ёсць добраахвотнае страхаванне дадатковай пенсіі. Так, можна альбо самастойна аформіць такі поліс, альбо з дапамогай наймальніка — па схеме «3+3».
Вось гэтыя назапашванні праз страхавыя кампаніі могуць дастацца ў спадчыну, то-бок блізкія пенсіянера маюць права прэтэндаваць на гэтыя назапашванні, за вылікам выдаткаў страхавой кампаніі.
Глядзіце таксама
У гэтым выпадку спадчыннікам трэба звярнуцца да натарыуса, які выдасць пасведчанне пра права на спадчыну, пасля чаго яны змогуць атрымаць тыя выплаты, якія належалі іх памерламу сваяку.
«Назапашванні па страхаванні дадатковай пенсіі ўспадкоўваюцца паводле закона. Акрамя гэтага, вы можаце аформіць тэстамент з указаннем, хто будзе мець права атрымаць сродкі пасля смерці, — тлумачыць кампанія „Стравіта“. — Таксама калі чалавек выйшаў на пенсію, але праз нейкі час памёр, усё, што належыць яму паводле дамовы, спадчыннікі таксама атрымаюць».