Улады зняпраўдзілі, што каля Лынтупаў будзе магільнік БелАЭС
У Пастаўскім райвыканкаме зняпраўдзілі інфармацыю, якая з’явілася ў сацсетках, пра будаўніцтва каля пасёлка Лынтупы на Віцебшчыне магільніка для радыёактыўных адкідаў з Беларускай АЭС, піша «Радыё Свабода».
6 чэрвеня ў будынку Лынтупскага
сельсавету адбудзецца сход, які мае абмеркаваць справаздачу аб ацэнцы ўздзеяння
на навакольнае асяроддзе новага пясочна-гравійнага кар'ера. Поўная назва
аб'екта: «Распрацоўка і рэкультывацыя кар’ера ў паўночнай частцы радовішча
пясчана-гравійнай сумесі Вінцантоўскае Пастаўскага раёну Віцебскай вобласці».
Пясочна-гравійная сумесь будзе выкарыстоўвацца для рамонту дарог.
«І ніякага будаўніцтва магільніка», — сказала начальніца аддзелу землеўпарадкавання Алена Іванькова.
«У нас ёсць кар’ер у Пятровічах і будзе ў Лынтупах. Бо адзін з кар’ераў выпрацаваны і закрываецца. Ёсць выведанае радовішча, працуем у рамках закону. У інтэрнэце можна пісаць усё што заўгодна. Я кажу, што будзе насамрэч», — сказаў начальнік Пастаўскага ДРСУ № 132 Станіслаў Рагіня.
Астравецкая АЭС
Ірына Сухій з грамадскага аб’яднання
«Экадом» назвала распаўсюджаную ў інтэрнэце інфармацыю пра будаўніцтва
магільніка фэйкам.
«Ва ўсякім разе, там будзе абмеркаванне Ацэнкі ўздзеяння на навакольнае асяроддзе распрацоўкі кар’ера. У нас гэтыя дакументы ёсць. Адзін з актывістаў чамусьці зрабіў выснову, што там потым будуць хаваць адкіды з АЭС. Гэта домысел», — сказала Ірына Сухій.
У Міністэрстве энергетыкі карэспандэнту “Свабоды” адказалі, што «выбар пляцоўкі для будаўніцтва сховішча радыёактыўных адкідаў Беларускай АЭС не адбываўся. Дадзеная работа будзе выконвацца пасля 2021 году ў адпаведнасці з заканадаўствам Рэспублікі Беларусь».
Гарадскі пасёлак Лынтупы знаходзіцца каля мяжы з Літвой. Ад Астраўца да Лынтупаў каля 67 кіламетраў.
Раней у Нацыянальнай акадэміі навук і Аб’яднаным інстытуце энергетычных і ядзерных даследаванняў «Сосны» вырашылі, што спачатку адпрацаванае паліва будуць каля 10 год захоўваць на назапашвальнай пляцоўцы ў Беларусі, потым павязуць на перапрацоўку ў Расію. Там з яго выдзеляць «карысныя прадукты» і вернуць для пахавання ў Беларусі. Гэты варыянт выбралі як прыярытэтны, сказаў Аляксандр Парфёнаў, намеснік галоўнага інжынера Беларускай АЭС.
Разглядаліся яшчэ два варыянты. Але ва ўсіх прадугледжваецца, што адкіды, перапрацаваныя ці не, будуць пахаваныя ў Беларусі — у «прыпаверхневых збудаваннях».