У Тураве абвесцяць Абаронцаў дзікай прыроды — 2018

Гэтым званнем ганаруе глабальная прыродаахоўная асацыяцыя BirdLife International. Трох Абаронцаў дзікай прыроды Беларусі абвесцяць 26 траўня на Фестывалі кулікоў у Тураве, які ладзіць грамадская арганізацыя «Ахова птушак Бацькаўшчыны» разам з Тураўскім выканкамам.

Гэтым званнем з 2018 года штогод ушаноўваюць асоб або групы актывістаў за выбітную працу па ахове дзікай прыроды на нацыянальным ці мясцовым узроўні.
Летась першымі Абаронцамі дзікай прыроды ў Беларусі былі абвешчаныя вядомы арнітолаг Уладзімір Іваноўскі, былы супрацоўнік заказніка “Выганашчанскае” Мікалай Варабей і старшы дзяржаўны інспектар Тураўскай міжраённай інспекцыі аховы жывёльнага і расліннага свету пры прэзідэнце Рэспублікі Беларусь Міхаіл Ярмоліч.
У студзені грамадская арганізацыя “Ахова птушак Бацькаўшчыны” (АПБ) як нацыянальны партнёр BirdLife International запрашала ўсіх прапанаваць свайго намінанта. З сямі кандыдатур Цэнтральным саветам АПБ было адабрана тры: гэта максімальная колькасць, якую можа намінаваць на званне кожны нацыянальны партнёр BirdLife International з 110 краін.
Пры адборы ўлічвалася адпаведнасць кандыдатуры пэўным крытэрам. Званнем Абаронцаў дзікай прыроды могуць ганараваць за дасягненні ў маніторынгу біяразнастайнасці, кіраванні ахоўнымі тэрыторыямі, народнай навуцы, далучэнні людзей да аховы прыроды, а таксама за іншыя значныя ўнёскі ў ахову дзікай прыроды.
Дыпломы беларускім героям уручаць 26 траўня на Фестывалі кулікоў у Тураве. Завітвайце на фэст і натхняйцеся на добрыя справы дзеля нашай прыроды!
Аляксандр Вінчэўскі, дырэктар АПБ:
“Паглядзець на тураўцаў, мясцовых кулікоў, знакамітае ў Еўропе Тураўскае балонне, пазнаёміцца з беларускімі абаронцамі дзікай прыроды і супрацоўнікамі Каралеўскага таварыства абароны птушак з Вялікабрытаніі – ваш шанс адзін раз на год: 26 траўня на Фестывалі кулікоў”.
Паводле прэс-рэлізу

Даведка: Грамадская арганізацыя "Ахова птушак Бацькаўшчыны" (АПБ) — найбуйнейшая прыродаахоўная грамадская арганізацыя Беларусі і з 2005 года — нацыянальны партнёр глабальнай прыродаахоўнай асацыяцыі "BirdLife International", у якую ўваходзяць арганізацыі са 121 краіны. АПБ — гэта больш за 2500 сябраў і валанцёраў і больш за 30000 прыхільнікаў, 100 школьных клубаў і 14 мясцовых аддзяленняў па ўсёй краіне. Арганізацыя працуе дзеля захавання біяразнастайнасці і далучэння насельніцтва да актыўнай аховы прыроды.