У Віцебску адкрылі фрэскі XVIII стагоддзя
Падчас працы ў галоўным корпусе былога будынку Базыліянскага кляштара ў Віцебску адкрылі фрэскі другой паловы XVIII стагоддзя.
Фрэскі знайшлі ў памяшканні былой цёплай царквы пад
некалькімі слаямі алейнай фарбы, якой пакрывалі сцены ў будынку, дзе да
апошняга часу размяшчаўся станка-інструментальны каледж. Пра знаходку паведаміў
у сацыяльных сетках архітэктар Яўген Калбовіч.
У 2017 годзе гэты будынак перадалі гімназіі №1, і пачалася падрыхтоўка да яго рэканструкцыі.
Акрамя фрэсак на столі будынку пры расчыстцы адкрыўся роспіс, выкананы ў тэхніцы грызайля — гэты від дэкаратыўнага жывапісу выкарыстоўваўся для імітацыі скульптурных барэльефаў, ці архітэктурных формаў.
Мураваныя будынкі Базыліянскага кляштару будаваліся з 1743 па 1785 год, акрамя памяшканняў манахаў у ім знаходзілася і школа для дзяцей шляхты. У 1799 годзе па загадзе расейскага імператара Паўла I кляштар і сабор пры ім былі перададзеныя праваслаўнаму ведамству.
Будынак галоўнага корпуса былога базыльянскага кляштару. Фота Юрый Шэпелеў
Пасля закрыцця каледжа на будынак прэтэндавалі некалькі розных арганізацыяў, у тым ліку — Віцебская епархія Беларускай праваслаўнай царквы. Галоўны корпус кляштара захаваўся ў перабудаваным выглядзе – ён быў значна пашыраны і страціў барочны дах.