Беларусь на саміце «Усходняга партнёрства» будзе прадстаўляць пустое крэсла

Беларусь на саміце «Усходняга партнёрства» 15 снежня будзе прадстаўляць пустое крэсла. Пра гэта напісаў журналіст RFE/RL Рыкард Ёзвяк. Раней такі варыянт прэзентацыі нашай краіны на гэтым мерапрыемстве ўжо разглядаўся.

«Як і чакалася, Беларусь будзе “прадстаўлена” пустым крэслам на саміце “Усходняга партнёрства” у Брусэлі 15 снежня. Будзе ўстаноўлена імянная таблічка і сцяг Беларусі. Прадстаўнікі грамадзянскай супольнасці краіны чакаюцца ў Брусэлі за некалькі дзён да саміту», — цытуе Ёзвяка REFORM.by.

Нагадаем, МЗС Беларусі заявіў аб прыпыненні ўдзелу ва «Усходнім партнёрстве» ў канцы чэрвеня гэтага года ў адказ на чарговы пакет санкцый Еўрасаюза.

Дэмакратычныя сілы заклікалі запрасіць на саміт прадстаўнікоў грамадзянскай супольнасці замест дзяржаўных чыноўнікаў.

Ва «Усходняе партнёрства», акрамя Беларусі, уваходзяць Грузія, Украіна, Малдова, Азербайджан і Арменія. Лукашэнка неаднаразова запрашалі на саміты ініцыятывы, аднак у выніку Беларусь была прадстаўлена на ўзроўні не вышэй міністра замежных спраў.

«Усходняе партнёрства» — праект Еўрапейскага саюза, які мае асноўнай мэтай развіццё інтэграцыйных сувязяў Еўрасаюза з шасцю краінамі былога СССР: Азербайджанам, Арменіяй, Беларуссю, Грузіяй, Малдовай і Украінай.

Ініцыятыва разглядаецца як свайго роду рэгіянальнае вымярэнне еўрапейскай палітыкі суседства, якая была ініцыяваная Еўрасаюзам у дачыненні да сваіх «новых суседзяў» пасля чарговага пашырэння ў траўні 2004 года. Асноўнымі прыярытэтамі рэформаў у краінах-партнёрах і іх супрацоўніцтва з ЕС названыя наступныя вобласці:

• дэмакратыя, удасканаленне сістэмы кіравання і забеспячэнне стабільнасці;
• эканамічная інтэграцыя і канвергенцыя з галіновай эканамічнай палітыкай ЕС, уключаючы стварэнне зон свабоднага гандлю;
• энергетычная бяспека;
• развіццё кантактаў паміж людзьмі (лібералізацыя візавага рэжыму і ўзмацненне барацьбы з незаконнай міграцыяй).

Ініцыятыва прадугледжвае заключэнне ў перспектыве двухбаковых пагадненняў паміж ЕС і краінамі-партнёрамі аб асацыяцыі, што павінна паслужыць важным крокам на шляху іх далейшай інтэграцыі ў еўрапейскую сацыяльна-эканамічную і палітычную прастору.