Лінкявічус: у ЕС не засталося тых, хто сумняецца па санкцыях у дачыненні да Лукашэнкі
Кіраўнікі дыпламатычных службаў Еўрасаюза аднагалосна дамовіліся аб прымяненні санкцый у дачыненні да Лукашэнкі, унесці яго ў спіс з іншымі новымі асобамі. Пра гэта паведаміў міністр замежных спраў Літвы Лінас Лінкявічус, перадае партал Delfi са спасылкай на BNS.
«Была пэўная спрэчка, ці ўносіць яго (Лукашэнку) або не ўносіць, то цяпер <...> сумневаў не засталося. Паколькі рашэнне варта прымаць аднагалосна, нават калі было мала выступоўцаў супраць, мы не маглі яго прыняць. Цяпер гэтага няма», — сказаў Лінкявічус.
«Цяпер тэхнічна прыйдзецца выканаць пэўную працу па дапаўненні спісу асоб, якія трапляюць пад санкцыі ў Беларусі. Паколькі было 40, але не было Лукашэнкі, і цяпер па пагадненні бакоў ён павінен быць у гэтым спісе. Яшчэ дадатковыя службовыя асобы будуць унесены», — дадаў кіраўнік МЗС Літвы.
Ён падкрэсліў, што чарговыя масавыя затрыманні пратэстоўцаў у Беларусі не дазваляюць казаць, што сітуацыя вырашаецца і мяняецца да лепшага.
Як паведамляў БелаПАН, 12 кастрычніка Рада міністраў замежных спраў Еўрасаюза прынцыпова ўхваліў пашырэнне спісу санкцый у дачыненні да беларускага рэжыму. У заяве па выніках пасяджэння Рада нагадала аб санкцыях, уведзеных у дачыненні да 40 беларускіх службовых асоб, якія, на думку Еўрасаюза, адказныя за фальсіфікацыі падчас выбараў і гвалт у дачыненні да мірных дэманстрантаў.
«Рада заяўляе пра гатоўнасць ЕС прыняць далейшыя абмежавальныя меры ў дачыненні да прадпрыемстваў і высокапастаўленых службовых асоб, у тым ліку Лукашэнкі, калі сітуацыя не палепшыцца», — гаворыцца ў заяве.
Адзначаецца таксама, што ЕС «скароціць двухбаковае супрацоўніцтва з беларускімі ўладамі на цэнтральным узроўні, павялічыць падтрымку беларускага народа і грамадзянскай супольнасці і, адпаведна, зменіць сваю двухбаковую фінансавую дапамогу».
«У адпаведнасці з гэтым ЕС неадкладна надаў дадатковыя фінансавыя рэсурсы ахвярам гвалту, арганізацыям грамадзянскай супольнасці і незалежным СМІ», — сказана ў дакуменце.
Рада ЕС таксама чарговым разам падкрэсліла неабходнасць пачатку ў Беларусі «сур’ёзнага, годнага даверу, інклюзіўнага палітычнага працэсу, які прывядзе да свабодных і справядлівых выбараў пад наглядам БДІПЧ АБСЕ і забяспечыць гарантыі павагі правоў чалавека».
Паводле Naviny.media