«Маладая гвардыя» — пра тое, як сілавікі рыхтуюць сабе змену

Сілавікі ствараюць не толькі ваенна-патрыятычныя клубы, але і спрабуюць іх аб'яднаць у нешта больш маштабнае. І пад іх «крылом» ужо знаходзяцца тысячы маладых людзей.

У ваенна-патрыятычных клубаў з'явіўся свой дабрачынны фонд. Пра яго стварэнне абвясціў намеснік міністра ўнутраных спраў — камандуючы ўнутранымі войскамі Мікалай Карпянкоў.

У Беларусі стварылі мясцовы дабрачынны фонд з красамоўнай назвай «Маладая гвардыя» — паводле задумы арганізатараў, ён аб'яднае 18 ваенна-патрыятычных клубаў войскаў (больш за 2000 выхаванцаў), а таксама палітыкаў і бізнэсменаў, піша «Салідарнасць».

На прэзентацыі 19 мая ў в/ч 3214 ва Уруччы падлеткі-выхаванцы клубаў паказалі свае ўменні: зборку і разборку аўтаматаў, стральбу з розных відаў зброі, скалалазанне, рукапашны бой, аказанне першай дапамогі, кіраванне беспілотнікамі, у тым ліку FPV-дронамі. Калі ў 2024 годзе беларускі школьнік усяго гэтага не ўмее, то патрыятызму ў ім, мабыць, недастаткова.

Галоўнай ідэяй арганізатары фонду назвалі аказанне бязвыплатнай дапамогі клубам і развіццё патрыятычнага руху сярод моладзі.

Як заявіў на прэзентацыі клуба камандуючы ўнутранымі войскамі, намеснік міністра МУС Мікалай Карпянкоў, акрамя «развіцця патрыятычнага выхавання», новая структура будзе рэалізоўваць розныя праграмы: «адукацыйныя, духоўныя, культурныя для нашых дзяцей», ну і дадаткова акумуляваць фінансы для аказання дапамогі «там, дзе яна патрэбная».

«Ёсць каму займацца генацыдам, але няма каму працаваць»

Сілавік адзначыў, што назва савецкай падпольнай арганізацыі ўзятая «дзеля захавання гістарычнай праўды», паколькі беларускія дзеці, маўляў, «праўнукі пераможцаў Вялікай Айчыннай», а таксама «наша светлая будучыня і наша абароненасць».

Дырэктарка фонду Ала Веруш — прафесарка кафедры філасофіі і ідэалагічнай працы Акадэміі МУС Беларусі — запэўнівае, што «ёсць вельмі шмат свядомых грамадзян» з ліку прадпрымальнікаў і прадстаўнікоў сістэмы дзяржкіравання, якія прагнуць дапамагчы «Маладой гвардыі» словам, справай і, вядома, рублём. На сёння, да прыкладу, у апякунскім фондзе 13 чалавек: «Прадстаўнікі ўсіх зацікаўленых ведамстваў, работнікі СМІ, прадпрымальнікі, палітыкі», — але гэтая колькасць можа павялічыцца.

«Вішанька на торце» — юрыдычна фонд быў зарэгістраваны яшчэ два тыдні таму па адрасе Нацыянальнай бібліятэкі Беларусі.

І тут, падобна, сышліся адразу два моманты. Па-першае, сілавікі, якія маюць карт-бланш ад усіх дзяржструктур на «патрыятычнае выхаванне» і ідэалагічную працу, працягваюць нарошчваць свой актыў.

Хоць чаму «духоўнаму» і «культурнаму» можа навучыць беларускіх хлопчыкаў і дзяўчат Мікалай Карпянкоў, вядомы асаблівай агрэсіяй і адкрытымі заклікамі да гвалту ў 2020-м, а таксама тым, што асабіста граміў вітрыны кавярні ў цэнтры Мінска, дзе хаваліся пратэстоўцы, — пытанне рытарычнае.

Але, па-другое, на падрыхтоўку наступных пакаленняў адданых слуг рэжыму, якія будуць атрымліваць ільготы пры паступленні ў міліцэйскія і ваенныя ўстановы адукацыі, а далей — кватэры, добрыя заробкі і іншыя «плюшкі» за руплівую службу, патрэбныя грошы.

А ў Беларусі ёсць армія?

Таму ў Беларусі, як грыбы пасля дажджу, растуць не толькі новыя падраздзяленні спецназа і ваенна-патрыятычныя клубы, але і спатрэбіўся асобны, спецыяльны дабрачынны фонд у шастаючай абгортцы «патрыятызму», шчодра пасыпанай адсылкай у савецкае мінулае і ранейшую «маладую гвардыю».

І калі цяпер, як запэўніваюць прапагандысты і чыноўнікі, хапае лаяльных да ўладаў бізнэсменаў, гатовых падтрымаць гэтую ідэю фінансава, то ў перспектыве нельга выключыць новага, абавязковага ўжо для ўсіх прадпрымальнікаў, падатку «на патрыятызм» або рэгулярных добраахвотна-прымусовых збораў.

Таму што бізнэсменаў у краіне, у адрозненне ад сілавікоў, больш не становіцца, а грошы на ўтрыманне апошніх рэжыму вельмі патрэбныя.