Сотні назіральнікаў з Беларусі могуць паехаць на ўкраінскія выбары

Грамадскі камітэт салідарнасці з Украінай гатовы накіраваць з Беларусі для назірання за ўкраінскімі прэзідэнцкімі выбарамі каля сотні чалавек. Аб гэтым паведаміў БелаПАН старшыня аргкамітэта па стварэнні партыі "Беларуская хрысціянская дэмакратыя" Павел Севярынец па выніках пасяджэння камітэта 23 красавіка.



Паводле яго слоў, магчымасць назірання за прэзідэнцкімі выбарамі ва Украіне, якія адбудуцца 25 мая, цяпер абмяркоўваецца ў рабочым парадку. У прыватнасці, паведаміў палітык, да 17 мая Цэнтральная выбарчая камісія Украіны прымае заявы аб жаданні ўзяць удзел у назіранні. Акрамя таго, праводзіцца праца ў Кіеве праз прадстаўнікоў палітычных сіл Украіны, якім прасцей весці размову з ЦВК.
 

"Мы гатовы накіраваць каля ста назіральнікаў, якія ўжо маюць вопыт адпаведнай працы. Але пакуль канкрэтных дамоўленасцей наконт гэтага не дасягнута. Ідуць перамовы, ёсць тэкст звароту ў Цэнтрвыбаркам. У пачатку мая мы будзем падаваць дакументы", — сказаў Севярынец.
 

Ён адзначыў, што на пасяджэнні камітэта абмеркавалі пытанні дапамогі пацярпелым на кіеўскім Майдане. Паводле слоў палітыка, акрамя сваякоў загінулага беларуса Міхаіла Жызнеўскага, у дапамозе маюць патрэбу яшчэ некалькі чалавек. Таксама прагучала прапанова дапамагчы ва ўстаноўцы помніка на магіле Жызнеўскага, пачаўся збор сродкаў.
 

Акрамя таго, паведаміў Севярынец, на пасяджэнні абмеркавалі ідэю накіравання ў Міністэрства замежных спраў Беларусі звароты з просьбай растлумачыць, ці з`яўляецца паяўленне чырвона-зялёных сцягоў на акцыях сепаратыстаў ва Украіне адлюстраваннем афіцыйнай палітыкі Беларусі або гэта прыватныя ініцыятывы. Плануецца, адзначыў ён, што тэкст звароту будзе падрыхтаваны да наступнага пасяджэння камітэта, якое адбудзецца 8 мая.
 

Палітык паведаміў, што на 7 мая запланавана правядзенне ў Мінску вечара салідарнасці з Украінай, куды будуць запрашацца беларусы, якія ўдзельнічалі ў падзеях на Майдане.
 

Камітэт салідарнасці з Украінай створаны ў Беларусі як нефармальная грамадская ініцыятыва ў сакавіку 2014 года. У яго склад увайшлі некалькі дзясяткаў чалавек, у тым ліку вядомыя палітыкі і грамадскія дзеячы Павел Севярынец, Аляксей Марачкін, Аляксей Янукевіч, Дзмітрый Дашкевіч, Ігар Рынкевіч, Ганна Шапуцька і іншыя. Сёння, паведаміў Севярынец, да ўдзелу ў дзейнасці камітэта далучыўся Станіслаў Шушкевіч.

Сяргей Каралевіч, БелаПАН