Валерый Карбалевіч пра змены ў Канстытуцыі: Проста пройдзе рэферэндум, дзе абвесцяць 80% — і ўсё

Палітолаг — пра рэферэндум, сэнс якога не разумее ніхто.

Аляксандр Лукашэнка падчас інтэрв'ю Дзмітрыю Кісялёву не выключыў новых прэзідэнцкіх выбараў. «Яны максімум адбудуцца ў тэрмін. Але, магчыма, будуць і датэрміновыя», — сказаў ён.

Ці пойдзе Лукашэнка на новыя выбары? «Филин» спытаў пра гэта ў палітолага Валерыя Карбалевіча.

— Спрабаваць разгадаць палітычныя сны Аляксандра Лукашэнкі — гэта не самая ўдзячная справа. Я б хацеў адзначыць, што ён сыходзіў ад канкрэтных адказаў на пытанні пра датэрміновыя выбары, ці будзе ён у іх удзельнічаць. Лукашэнка ўжо шмат разоў ухіляўся ад адказаў на гэтыя тэмы.

Цяпер мы маем справу з досыць абсурднай сітуацыяй: краіна рыхтуецца да рэферэндуму па новай Канстытуцыі, але ніхто ў краіне не ведае, для чаго ж гэтая Канстытуцыя патрэбная. І праціўнікі Лукашэнкі не ведаюць, і прыхільнікі не ведаюць.

І самае галоўнае — сам Лукашэнка нават не спрабуе растлумачыць людзям нічога.

Хутчэй за ўсё, сам Лукашэнка да канца не ведае, што ж там будзе. Мне здаецца, што ён і далей нічога нікому тлумачыць не будзе. Проста пройдзе рэферэндум, дзе абвесцяць 80% — і ўсё.

Акрамя таго, Лукашэнка яшчэ больш напусціў туману, калі сказаў, што не ведае, ці будзе ўдзельнічаць у новых выбарах, усё будзе залежаць ад сітуацыі. Калі раней ён гаварыў, што Канстытуцыя — для новага прэзідэнта, то тады было хоць нешта зразумела.

Сітуацыя абсалютна абсурдная. І яшчэ больш абсурднай яна становіцца, калі ўлады ўжо вядуць падрыхтоўку да рэферэндуму, праводзяць сацыялагічныя апытанні. Мне здаецца, што гэта ідэалагічная кампанія ў падтрымку невядома чаго.

Як кажа сам Лукашэнка, народ падтрымлівае. Выбачайце, але падтрымлівае што? Калі нават праекта Канстытуцыі няма. Такой абсурднай сітуацыі яшчэ ніколі не было ў краіне.

Суразмоўца адзначае, што нядаўна кіраўнік Адміністрацыі Лукашэнкі Ігар Сяргеенка ўпершыню агучыў пэўныя пункты новай Канстытуцыі.

— Лукашэнка хоча, каб на новай пасадзе, кіраўніка УНС, кантраляваць новага прэзідэнта. Але тады ўзнікае пытанне: а чаму не сказаць, што я сыходжу? Ён раней гэта агучваў, але чым бліжэй рэферэндум, тым больш туману. Хоць бы нейкую інфармацыю далі людзям.

У мяне такое ўражанне, што Лукашэнка яшчэ да канца не прыняў рашэнне. Як сумясціць несумяшчальныя рэчы: пакінуць моцную прэзідэнцкую ўладу і кантраляваць прэзідэнта пры дапамозе УНС.

Я не выключаю, што Пуцін не вельмі задаволены гэтым праектам. І Лукашэнка вельмі хочацца «ўламаць» Пуціна: адсюль заявы пра Крым і падобнае. Але гэта ўсё здагадкі, а дзяржаўны апарат рыхтуе рэферэндум, не разумеючы яго сэнсу.

Магчыма, Лукашэнка не хоча апынуцца ў сітуацыі «кульгавай качкі». Яму не хочацца быць чалавекам, які дажывае на сваёй пасадзе апошнія месяцы. Калі пра гэта заявіць публічна, то пачнуцца хістанні ў дзяржаўным апараце, сілавых структурах, людзі пачнуць азірацца: што далей, хто цяпер будзе ва ўладзе? Ён гэта разумее, таму не дае канкрэтных адказаў.

Валерый Карбалевіч не звязвае правядзенне рэферэндуму з выхадам з палітычнага крызісу.

— Як можна выйсці з крызісу з дапамогай рэферэндуму, сэнс якога ніхто не разумее? З восені 2020 года, з падачы Масквы, гэта разглядалася выхадам з крызісу. Але цяпер гэтага няма — гэта хутчэй сродак працягу паўнамоцтваў Лукашэнкі, толькі ўжо на новай пасадзе, сродак захавання рэжыму, але без Лукашэнкі-прэзідэнта.