Не для таго расцілі: беларускія спартсмены павінны будуць вяртаць назад дзяржаўныя стыпендыі
У шэрагу выпадкаў, сярод якіх — падрыхтоўка за мяжой без накіравання, публікацыі без дазволу і іншыя цікавосткі.
Ілюстрацыйнае фота Дзмітрыя Дзмітрыева
30 снежня было зменена палажэнне аб выплаце беларускім спартсменам з боку дзяржавы імянных стыпендый за высокія вынікі на спаборніцтвах, а таксама прызавых у грашовай або натуральнай форме.
Апроч іншага, у дакуменце зараз прапісана патрабаванне вяртаць ужо выплачаныя сродкі па імянной стыпендыі ў выпадку спынення яе выплаты з пэўных прычын. Раней такога механізму не існавала, піша «Тр*буна».
У якасці прычын вяртання сродкаў указаны:
- падрыхтоўка па-за межамі Беларусі без накіравання ад беларускай арганізацыі, з якой заключана дамова;
- выступленне за нацыянальныя і (або) зборныя каманды іншых дзяржаў;
- прыцягненне да крымінальнай адказнасці незалежна ад зняцця або пагашэння судзімасці, заканчэння тэрміну даўнасці або амністыі;
- учыненне супрацьпраўных дзеянняў супраць парадку кіравання, грамадскага парадку і грамадскай маральнасці;
- непаважлівае стаўленне да дзяржаўных і грамадскіх інстытутаў, канстытуцыйнага ладу;
- публікацыі ці выступленні, звязаныя з прафесійнай дзейнасцю, без узгаднення з беларускай арганізацыяй, з якой заключана дамова;
- устанаўленне фактаў наяўнасці недакладных звестак у прадастаўленых для назначэння імянной стыпендыі дакументах.
Вярнуць грошы патрабуюць у тэрмін да паўгода. Можна падаць хадайніцтва ў Мінспорту аб растэрміноўцы яшчэ максімум на шэсць месяцаў. Калі сродкі не вярнулі, Мінспорту «прымае меры па спагнанні ў судовым парадку».
Падставамі для прыпынення або спынення выплаты імянных стыпендый без патрабавання вяртання сродкаў з'яўляюцца:
- удзел у міжнародных спартыўных мерапрыемствах без накіравання ад беларускай арганізацыі, з якой заключана дамова;
- безвыніковасць вучэбна-трэніровачнага працэсу і (або) невыкананне індывідуальных планаў спартыўнай падрыхтоўкі, у тым ліку з-за дэкрэтнага водпуску;
- невыкананне або неналежнае выкананне ўмоў дамовы;
- недасягненне вынікаў, прадугледжаных дамовай;
- парушэнне абавязкаў па ўдзеле ў афіцыйных спартыўных мерапрыемствах;
- неўстараненне прычын, якія паслужылі падставамі для прыпынення выплат;
- іншыя прадугледжаныя выпадкі.
