Азербайджан нанёс артылерыйскія ўдары па армянскіх гарадах паблізу Карабаха

Учора позна ўвечары Міністэрства абароны Арменіі паведаміла аб абстрэле сваіх тэрыторый паблізу непрызнанага Нагорнага Карабаха з боку Азербайджана. Пра гэта ў фэйсбуку напісаў прэс-сакратар армянскага абароннага ведамства Арам Тарасян.

«13 верасня ў 00:05 падраздзяленні Узброеных сіл Азербайджана пачалі стральбу з артылерыі, буйнакалібернай агнястрэльнай зброі па пазіцыях Арменіі ў Горысе, Сотку і Джэрмуку. Вораг таксама выкарыстоўвае БПЛА [беспілотныя лятальныя апараты]», — заявіў Тарасян. 

Горыс і Джэрмук — армянскія гарады з насельніцтвам 20 тысяч і 8 тысяч чалавек адпаведна паблізу мяжы непрызнанай Нагорна-Карабахскай Рэспублікі. Сотк — невялікае прыгранічнае сяло.

Мясцовыя жыхары распавялі журналістам, што абстрэлы ідуць у раёне Чорнага возера. Людзі таксама заўважылі ў небе беспілотнікі. Дэпутат парламента Арменіі Ганна Грыгаран сцвярджала, што наступ ішоў і ў кірунку Капана.

Мінабароны Азербайджана у сваю чаргу выпусціла заяву, у якім абвінаваціла Ерэван у дыверсіі.

«Узброеныя сілы Арменіі здзейснілі маштабную дыверсію на Дашкесанскім, Кяльбаджарскім і Лачынскім кірунках. Дыверсійныя групы Узброеных Сіл Арменіі ў цёмны час сутак замініравалі раёны і шляхі забеспячэння паміж пазіцыямі падраздзяленняў азербайджанскай арміі ў розных напрамках, выкарыстоўваючы горны рэльеф мясцовасці і існуючыя яры», — сказана ў заяве.

Паводле версіі Баку, бой завязаўся пасля дыверсій, з мінамётаў абстраляныя азербайджанскія пазіцыі, ёсць страты сярод асабовага складу. Артабстрэлы Азербайджан называе «падаўленнем агнявых кропак праціўніка» і мерамі ў адказ. Па дадзеных азербайджанскага боку, армія Арменіі таксама губляла байцоў. Страты ў шэрагах УС Арменіі пацвердзілі і ў армянскім Мінабароны.

Праармянскія тэлеграм-каналы паведамляюць аб пашкоджанні жылых будынкаў у Сотку і Куце. Амбудсмен Арменіі Крысціне Грыгаран заявіла пра ўдары па грамадзянскіх аб'ектах.

Раён, дзе адбываліся боесутыкненні, можа стаць сухапутным калідорам для Азербайджана ў Нахічэвань —анклаў краіны, які аддзелены ад асноўнай часткі дзяржавы тэрыторыяй Арменіі. Шлях у Нахічэвань можа стаць транспартнай артэрыяй паміж Турцыяй і Азербайджанам.

Пракрамлёўскія тэлеграм-каналы заявілі, што па трывозе нібыта была паднятая 102-я вайсковая база ВС РФ у Гюмры (Арменія). Якіх-небудзь пацверджанняў гэтых паведамленняў няма.

UPD. Раніцай стала вядома, што паміж Азербайджанам і Арменіяй дасягнута перамір'е.

У апошні раз эскалацыя паміж Арменіяй і Азербайджанам назіралася ў канцы жніўня — тады армія Азербайджана заняла горад Лачын, вёскі Сус і Забух у Нагорным Карабаху.

Лачынскі калідор злучае Арменію і Нагорны Карабах. Пасля заканчэння вайны ў Карабаху 2020 года транспартная артэрыя перайшла пад кантроль расійскіх міратворцаў. Азербайджан жа пасля падпісання мірнага дагавора прапаноўваў перадаць Лачын пад свой кантроль.

Арменія — сябра АДКБ. Паводле адпаведнай дамовы, напад на яе тэрыторыю лічыцца нападам на тэрыторыю іншых чальцоў АДКБ — Расіі, Беларусі, Казахстана, Кыргызстана і Таджыкістана.