Феномен Надзеждзіна. Дасье ў карыкатурах і мемах

Дзякуючы лібералу Барысу Надзеждзіну нечакана ў прэзідэнцкіх выбарах у Расіі ўзнікла інтрыга. На яе чакана адрэагавалі і карыкатурысты.

Калі мінулай восенню ў РФ стартавала прэзідэнцкая кампанія, будзь якая інтрыга праглядалася слаба. Апазіцыйнае поле было зачышчана яшчэ адразу пасля пачатку вайны з Украінай. Крытыкі рэжыму з шэрагаў «патрыётаў» былі альбо мёртвыя (Прыгожын) альбо апынуліся ў турме (Гіркін). Камуністы, у якіх ёсць не дрэнны электаральны рэсурс, выставілі загадзя слабога кандыдата (Харытонаў). Канчаткова надзеі на нейкую драматургію на выбарах пахавала гісторыя Кацярыны Дунцовай — журналісткі, незалежнага кандыдата ліберальных поглядаў, якую любілі адлюстроўваць як героя анімэ. Самавылучэнку знялі яшчэ на этапе рэгістрацыі ініцыятыўнай групы.

Вонкава ўсё ішло да таго, што выбары ператворацца ў нейкі рэферэндум даверу да ўлады. Аднак нечакана гэты сюжэт парушыў былы дэпутат Дзярждумы Барыс Надзеждзін — супрацоўнік апарата ўрада часоў «маладых рэфарматараў» Анатоля Чубайса і Барыса Нямцова, дэпутат Дзярждумы ад «Саюза правых сіл», а ў далейшым грамадскі дзеяч. За ягоную кандыдатуру пачалі масава збіраць подпісы расейцы, якія жывуць за мяжой, што выклікала цікавасць да Надзеждзіна ўнутры краіны. 

У студзені многія расіяне сталі ўсё часцей падпісвацца за Надзеждзіна. Шматлюдныя чэргі да пунктаў збору подпісаў сталі адным з сімвалаў прэзідэнцкіх выбараў 2024 года. На фоне сумнай агітацыйнай кампаніі за Пуціна ўсё гэта выглядала вельмі прыкметна. Карыкатурысты ахвотна эксплуатавалі такі кантраст.

Адначасова ў грамадстве пачалася дыскусія: ху із ю містэр Надзеждзін? Сам Барыс Надзеждзін называе сябе антываенным кандыдатам. Ён выступае супраць вайны ва Украіне. Аднак прапануе праводзіць рэферэндумы на акупаваных украінскіх тэрыторыях. Некаторыя сур'ёзна лічаць яго надзеяй у барацьбе з Уладзімірам Пуціным і нават параўноўваюць з нябожчыкам Прыгожыным, які летась падняў супраць Пуціна мяцеж.

У той жа час іншыя бачаць у палітыку чарговы спойлер, успамінаючы кампанію Ксенію Сабчак — крамлёўскі праект на выбарах 2019-га. Ксенія павінна была ствараць ілюзію канкурэнцыі і прысутнасці ў палітыцы ліберальнай апазіцыі. Зрэшты, трук не атрымаўся. Тыя ж карыкатурысты ахвотна высмейвалі ўчынкі і заявы вельмі далёкай ад простага электарату «свецкай ільвіцы».

Што да афіцыёзу, то феномен Надзеждзіна каментуюць не вельмі актыўна. Хутчэй за ўсё шмат будзе залежаць ад рэакцыі на яго выбарчую кампанію эміграцыйных апазіцыйных цэнтраў. Зрэшты, карыкатуры і мемы наконт таго, што Надзеждзін — агент Дзярждэпа, ужо з'явіліся.

Нарэшце, хапае тых, хто проста іранізуе над палітыкам. Асабліва «зайшла» такой публіцы фатаграфія, на якой Надзеждзін выяўлены з вялікім грыбам. Да гэтай выявы прыдумляюць разнастайныя подпісы.

Між тым 31 студзеня ЦВК Расіі завяршыла прыём дакументаў для ўдзелу ў выбарах прэзідэнта. У апошні дзень падпісныя лісты прывёз таксама і Барыс Надзеждзін. Праз некалькі гадзін прыйшло паведамленне, што дакументы Надзеждзіна прыняты ў поўным аб'ёме, гэта значыць, першасных заўваг не ўзнікла. 

Зрэшты, зразумела, што заўвагі могуць з'явіцца якія заўгодна і ў любы момант. Пра гэта намякае на сваім малюнку мастак выдання Deutsche Welle. 10 лютага ЦВК павінна даць Барысу канчатковы адказ. 

У любым выпадку, Надзеждзін ужо зараз выканаў важную місію. Дзякуючы яму раптам высветлілася, што людзей, якія сумняваюцца ў курсе ўладаў і гатовы пацвердзіць гэта сваімі асабістымі данымі, вельмі шмат.