Пуцін зноў шантажуе Еўропу газам, каб запусціць «Паўночны паток-2»

Пастаўкі газу ў Еўропу праз газаправод «Паўночны паток» могуць быць скарочаныя ўжо ў ліпені. Аб гэтым заявіў прэзідэнт Расіі Уладзімір Пуцін. Кампенсаваць гэта ён прапанаваў запускам газаправоду «Паўночны паток-2», гэты праект быў спынены з прычыны ўварвання Расіі ва Украіну.

Паводле Пуціна, на наступным тыдні расійскі газавы манапаліст «Газпром» адправіць на рамонт агрэгат, які перапампоўвае газ, пасля чаго магутнасць «Паўночнага патоку» знізіцца да 30 мільёнаў кубаметраў за суткі. Гэта 1/5 ад яго праектнай магутнасці. Расійскі прэзідэнт заявіў, што пастаўкі можна будзе ўтрымліваць на большым узроўні, калі Германія перадасць Расіі турбіну, што затрымлівалася Канадай з прычыны санкцый.

Пры гэтым у некаторыя перыяды трубаправод перапампоўваў больш газу, чым праектная магутнасць. Пасля пачатку вайны «Газпром» скараціў аб'ём прапампоўкі праз газаправод спачатку да 100 мільёнаў кубаметраў са 167, а потым – да 67 мільёнаў кубаметраў. Пасля гэтага ён быў спынены на рамонт, прапампоўка газу павінна аднавіцца 21 ліпеня.

Пуцін прапанаваў кампенсаваць пастаўкі з дапамогай газаправоду «Паўночны паток – 2», праект быў спынены перад запускам праз уварванне Расіі ва Украіну. «ПП-2» не сертыфікаваны нямецкімі ўладамі. Супраць узнаўлення праекту выступаюць і кіроўныя партыі Германіі, і большасць апазіцыі.

Эканоміка найбуйнейшай краіны Еўрасаюза Германіі і яшчэ некалькіх краін ЕС у значнай меры залежыць ад паставак газу з Расіі. Нямецкія палітыкі абвінавачваюць Маскву ў тым, што Крэмль выкарыстоўвае пастаўкі ў якасці зброі для ціску на еўрапейскія краіны.

Расійскія пастаўкі забяспечвалі прыблізна да 40 % газу ЕС, яго складана замяніць у кароткатэрміновай перспектыве. Нямецкая прамысловасць папярэджвае, што дэфіцыт паліва, які набліжаецца, прывядзе да рэцэсіі.

Краіны ЕС шукаюць спосабы кампенсаваць пастаўкі – як за кошт пакупак газу ў іншых пастаўшчыкоў, так і за кошт пошуку альтэрнатыўных крыніц паліва. Апроч таго, Еўрапейскі Саюз разглядае магчымасць добраахвотнага скарачэння на 15% спажывання прыроднага газу краінамі-членамі ўжо з наступнага месяца.