Reuters: расіяне, якія ваююць у Сірыі, выкарыстоўваюць базу Мінабароны пад Краснадарам

Тройчы за апошні месяц групы мужчын у цывільным адзенні, якія вярнуліся з Сірыі, адпраўляліся на базу міністэрства абароны Расіі паблізу хутара Молькіна пад Краснадарам, паведамляе "Радыё Свабода".

Са спасылкай на відавочцаў пра базу Мінабароны пад Краснадарам піша Reuters. Агенцтва мяркуе, што гэта байцы расійскіх прыватных ваенных кампаній.

Аўтобусы з прыбыўшымі з Дамаску групамі людзей, якія прайшлі праз службовыя памяшканні, адпраўляліся з аэрапорту 25 сакавіка, 6 і 17 красавіка. Іх бачылі карэспандэнты Reuters. Па дадзеных агенцтва, аўтобусы праехалі па дарозе, якая, згодна са спадарожнікавымі картамі, вядзе ў вайсковую частку ў Молькіна, дзе знаходзіцца 10-я асобная брыгада спецыяльнага прызначэння Мінабароны Расіі. Дзяжурны афіцэр брыгады сказаў, што да іх ніхто не заязджаў. Уладальнікі аўтобусаў пацвердзілі агенцтву, што здаюць іх у арэнду, але не раскрылі, каму менавіта. Адзін з суразмоўцаў назваў паездку ў Молькіна экскурсіяй.

Мінабароны і расійскае МЗС не адказалі на запыты агенцтва.

У пачатку красавіка Reuters упершыню паведаміла аб чартэрных пералётах авіякампаніі Cham Wings паміж Дамаскам і Растовам-на-Доне, якіх няма ў раскладзе растоўскага аэрапорта Платаў. Карэспандэнты агенцтва бачылі, што на гэтых самалётах з Расеі ў Сырыю вылятаюць «людзі ў камуфляжы». Са студзеня мінулага году Cham Wings, якая знаходзіцца пад санкцыямі ЗША, здзейсніла 51 палёт з Дамаску і Латакіі ў Растоў і назад.

Раней у сакавіку расследавальная група Conflict Intelligence Team (CIT) пацвердзіла сапраўднасць здымкаў базы «прыватнай расійскай ваеннай кампаніі Вагнера» ў​ Краснадарскім краі, якія апублікавала выданне Znak.com. У CIT, вывучыўшы здымкі са спадарожніку, высветлілі, што будаўніцтва базы «ПВК Вагнера» ў Молькіна пачалося ў лістападзе 2014 года і скончылася не пазней за сакавік 2016 года.

Па дадзеных СМІ, у шэрагах «прыватнай ваеннай кампаніі Вагнера» каля чатырох тысяч чалавек. Найміты, як мяркуецца, ваявалі на ўсходзе Украіны ў шэрагах сепаратыстаў, а таксама ваююць у Сірыі на баку войскаў Башара Асада.

Крэмль адпраўку прыватных ваенных кантрактнікаў у Сірыю адмаўляе. Найміцтва ў Расіі забаронена заканадаўствам.