Рускамоўныя навукоўцы за мяжой просяць падтрымаць калег з Украіны, Расіі і Беларусі

Прадстаўнікі рускамоўных акадэмічных колаў за мяжой падкрэслілі ў адкрытым лісце: «Вайна ва Украіне — гэта вайна Пуціна». Яны звярнулі ўвагу на запатрабаванне ў фінансаванні для падтрымкі калег з Украіны.
Разбомлены акупантамі ўніверсітэт у Харкаве. Фота: УНІАН

Разбомлены акупантамі ўніверсітэт у Харкаве. Фота: УНІАН


Прадстаўнікі рускамоўных акадэмічных колаў за мяжой апублікавалі адкрыты ліст з заклікам падтрымаць украінскіх, расійскіх і беларускіх навукоўцаў, якія пацярпелі ад вайны РФ у Украіне. Подпісы пад дакументам на панядзелак, 21 сакавіка, паставілі 69 выкладчыкаў універсітэтаў у ЗША, Канадзе, Вялікабрытаніі, Германіі, Францыі, Італіі, Нідэрландах, Фінляндыі.

Гаворачы пра ўкраінскіх калег, складальнікі звароту адзначылі, што акадэмічная супольнасць імкнецца не толькі дапамагчы ім маральна, але і «даць ім доступ да лабараторый і даследчых цэнтраў па ўсім свеце».

«Падтрымліваючы кар'еру перамешчаных студэнтаў і навукоўцаў, мы можам прыняць адчувальны ўдзел у садзейнічанні хуткаму аднаўленню пасляваеннай Украіны і змякчэнні сацыяльна-эканамічных наступстваў вайны», — падкрэсліваецца ў пасланні.

«Неабходна тэрміновае фінансаванне для ўкраінскіх навукоўцаў»


Складальнікі звароту звярнулі ўвагу на тое, што «неабходна тэрміновае фінансаванне», каб лабараторыі і даследчыя цэнтры з ЕС, ЗША, Канады, Японіі, Паўднёвай Карэі і іншых краін маглі даць магчымасць вочнага і дыстанцыйнага навучання і працаўладкавання перамешчаных студэнтаў і навукоўцаў з Украіны.

«Вайна ва Украіне — гэта вайна Пуціна»

Аўтары паслання таксама ўпэўненыя, што варта бачыць розніцу паміж уладамі РФ, якія знаходзяцца пад санкцыямі Захаду, і расійскімі студэнтамі і навукоўцамі, якія выступаюць супраць вайны. «Вайна ва Украіне —гэта вайна Пуціна, а не іх», — канстатуецца ў звароце.

«Прадстаўнікі натуральных і гуманітарных навук паслядоўна выступалі супраць рэжыму Пуціна рознымі спосабамі задоўга да цяперашніх падзей і занялі смелую пазіцыю супраць вайны», — гаворыцца далей у адкрытым лісце. «Удзельнікі антываенных пратэстаў у Расіі, у асноўным маладыя спецыялісты, падвяргаюцца арыштам і могуць быць зняволеныя на тэрмін да 15 гадоў у адпаведнасці з нядаўна прынятым расійскім законам», — адзначаецца ў ім.

Расійскія студэнты і навукоўцы — у падвойнай небяспецы, упэўненыя прадстаўнікі акадэмічнай супольнасці. З аднаго боку яны знаходзяцца пад пагрозай міжнароднай ізаляцыі ва ўмовах негатыўнага ўплыву заходніх санкцый, з другога — павінны баяцца пераследу з боку дзяржавы і ўзмацнення жорсткасці кантролю над інфармацыяй у РФ.

Дапамога неабходная і беларускім навукоўцам, якія пакутуюць ад рэжыму Лукашэнкі

«Тое самае датычыцца і беларускіх навукоўцаў, якія пакутуюць ад рэжыму Лукашэнкі», — папярэдзілі аўтары адкрытага ліста.

Яны заклікалі калег на Захадзе захоўваць асабістыя сувязі і падтрымліваць расійскіх і беларускіх спецыялістаў, якія выступаюць супраць вайны, але з розных прычын не могуць пакінуць гэтыя краіны. «Што тычыцца тых, хто ўцякае з Расіі і Беларусі, баючыся пераследу з боку дзяржавы, яны могуць прэтэндаваць на статус бежанцаў і маюць патрэбу ў падтрымцы з боку акадэмічных колаў і ўрадаў», — адзначылі падпісанты.

З-за вайны ва Украіне, развязанай расійскім прэзідэнтам Уладзімірам Пуціным, Германская служба акадэмічных абменаў (DAAD) прыпыніла праграмы і праекты, якія ажыццяўляюцца з Расіі. «Не можа быць нармальных здносін з дзяржавай, якая агрэсіўна вядзе вайну супраць суседняй краіны ў цэнтры Еўропы», — заявіла кіраўніца DAAD, кіраўніца ўніверсітэта імя Юстуса Лібіха (Justus-Liebig-Universität Giessen) Джобрайта Мукерджы (Joybrato Mukherjee).

Паводле dw.com.


Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: