Саакашвілі заяўляе пра магчымыя правакацыі ў Адэсе на гадавіну падзеяў 2 мая 2014 года
Старшыня Адэскай абласной дзяржаўнай адміністрацыі Міхаіл Саакашвілі заявіў, што трагедыя 2 мая 2014 года выкарыстоўваецца ўнутранымі і знешнімі сіламі для разгойдвання сітуацыі ў Адэсе і Украіне.
Дома прафсаюзаў. Адэса, май 2014 года
«Гадавіны 2 мая выкарыстоўваюцца сіламі,
якія не хочуць міру ва Украіне, а сілы гэта і знешнія,
і ўнутраныя. У мяне няма ніякага сумневу ў тым, што яны рыхтуюць
правакацыі. Яны будуць імкнуцца выкарыстоўваць гадавіну 2 мая для таго,
каб разгайдаць сітуацыю ў Адэсе і ва Украіне», — заявіў
у нядзелю Саакашвілі, дадаўшы, што мае канкрэтную «трывожную» інфармацыю
ад супрацоўнікаў СБУ і іншых службаў.
Старшыня Адэскай аблдзяржадміністрацыі адзначыў, што з іншага боку ёсць людзі, якім невыгодныя пераўтварэнні, якія праведзеныя ў Адэсе за апошні год і якія рыхтуюцца да рэалізацыі.
«Гэта карупцыянеры, мясцовыя мафіёзі. Многія з іх звязаныя з Масквой вельмі шчыльнымі сувязямі — гэта не выклікае ніякага сумневу», — сказаў Саакашвілі.
Расійскі бок пакуль гэтых заяваў Саакашвілі не каментаваў.
Як паведамлялі раней у паліцыі, у перыяд з 30 красавіка па 10 мая грамадскі парадак у Адэсе будуць забяспечваць каля 3 тысяч праваахоўнікаў, частка з якіх прыбудзе з іншых абласцей Украіны. Таксама 2 мая ўваход на Кулікова поле, дзе запланаваная памятная акцыя да гадавіны трагічных падзей, будзе магчымы толькі праз металашукальнікі.
Дома прафсаюзаў. Адэса, май 2014 года
Адэская трагедыя: Хто вінаваты? Раследаванне Зміцера Галко з месца трагедыі ў Адэсе ў маі 2014 года
2 мая 2014 года на марш футбольных фанатаў і праўкраінскіх сіл у цэнтры Адэсы напалі прарасійскія актывісты з агнястрэльнай зброяй. Былі забітыя шэсць чалавек-удзельнікаў маршу. Пасля праўкраінскія дэманстранты сабраліся ўжо на новую дэманстрацыю і рушылі на плошчу Кулікова поле, дзе знаходзілася намётавае мястэчка прарасійскіх актывістаў.
Прарасійскія актывісты і іх прыхільнікі схаваліся ў будынку Дома прафсаюзаў. Абодва бакі кідалі адзін у аднаго бутэлькі з гаручай вадкасцю. У выніку пажару, які ўзнік у доме, пры спробах выскачыць з яго і ў выніку прымянення прарасійскімі актывістамі агнястрэльнай зброі там загінулі яшчэ 42 чалавекі з абодвух бакоў канфлікту. Таксама ў ходзе супрацьстаяння ў той дзень былі параненыя каля 200 чалавек.
У цяперашні час у Маліноўскім райсудзе Адэсы разглядаюцца эпізоды вытворчасці аб масавых беспарадках, якія былі ў цэнтры горада.
На лаве падсудных — 20 абвінавачаных, з якіх пяць трымаюць пад вартай.