СГА ўпершыню ўзначаліць жанчына

Нгозі Аконджа-Івеяла — першая жанчына і першая прадстаўніца Афрыкі, якая стане гендырэктарам арганізацыі. Яна была кіруючым дырэктарам у Сусветным банку і два тэрміны займала пасаду кіраўніка Мінфіна Нігерыі.
Нгозі Аконджа-Івеяла (Фота: Martial Trezzini / EPA / ТАСС)

Нгозі Аконджа-Івеяла (Фота: Martial Trezzini / EPA / ТАСС)

Генеральным дырэктарам Сусветнай гандлёвай арганізацыі (СГА) упершыню выбрана жанчына — ураджэнка Нігерыі, эканаміст і эксперт па міжнародным развіцці Нгозі Аконджа-Івеяла. Рашэнне аб яе прызначэннi прыняў 15 лютага генеральны савет СГА.

Тэрмін паўнамоцтваў Аконджа-Івеяла, якая стане не толькі першай жанчынай, але і першым прадстаўніком Афрыкі на пасадзе кіраўніка СГА, пачнецца 1 сакавіка 2021 года. Займаць гэтую пасаду яна будзе да 31 жніўня 2025 года.

Пасада кіраўніка СГА заставалася вакантнай з 31 жніўня 2020 года, калі яе датэрмінова пакінуў бразілец Раберту Азэведа. Гэтую пасаду ён займаў з 2013 года, яго другі чатырохгадовы тэрмін павінен быў скончыцца ў жніўні 2021-га.

Нгозі Аконджа-Івеяла нарадзілася 13 чэрвеня 1954 года ў штаце Дэльта, Нігерыя. У 1973 годзе яна паступіла ў Гарвардскі ўніверсітэт, які скончыла з адзнакай, затым абараніла доктарскую дысертацыю па рэгіянальнай эканоміцы і развіцці ў Масачусецкім тэхналагічным інстытуце.

Аконджа-Івеяла 25 гадоў прапрацавала ў Сусветным банку ў якасці эканаміста па пытаннях развіцця, з 2007 па 2011 гады была яго кіруючым дырэктарам. Акрамя гэтага, яна ўзначальвала раду дырэктараў партнёрства прыватных і ўрадавых арганізацый Gavi, мэтай якога заяўлена павелічэнне даступнасці дзіцячай вакцынацыі ў бедных краінах.

З 2003 па 2006 і з 2011 па 2015 гады яна кіравала міністэрствам фінансаў Нігерыі, стаўшы першай жанчынай на гэтай пасадзе. Таксама займала пасаду кіраўніка МЗС гэтай краіны.

5 лютага ў інтэрв'ю CNN Аконджа-Івеяла заявіла, што СГА патрэбен лідар, здольны праводзіць рэформы і працаваць з з краінамі-ўдзельнікамі, каб арганізацыя «выйшла з паралічу, у якім яна знаходзіцца». У пачатку месяца адміністрацыя прэзідэнта ЗША Джо Байдэна паведаміла, што Вашынгтон падтрымлівае яе кандыдатуру на пасаду кіраўніка СГА.

СГА была створана ў 1995 годзе як пераемніца Генеральнага пагаднення па тарыфах і гандлі (ГАТТ, General Agreement on Tariffs and Trade). Арганізацыя адказвае за распрацоўку і ўкараненне новых гандлёвых пагадненняў, а таксама сочыць за выкананнем членамі арганізацыі ўсіх пагадненняў, падпісаных большасцю краін свету і ратыфікаваных іх парламентамі. Штаб-кватэра СГА размешчана ў Жэневе. На сённяшні дзень у арганізацыю ўваходзяць 164 краіны.

rbc.ru

Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: